By ខេត្តកំពង់ធំ៖ ស្ថានការណ៍គួរឱ្យសោកស្តាយបានកើតឡើងនៅភូមិកំពង់ថ្ម ឃុំកំពង់ថ្ម ស្រុកសន្ទុក ខេត្តកំពង់ធំ នៅពេលល្ងាចថ្ងៃទី១៤ ខែមីនា ឆ្នាំ២០២៦ ក្រោយកុមារប្រុសស្រីចំនួន ២នាក់បានបាត់បង់ជីវិតដោយសារការលេងគ្រាប់ M79 មិនទាន់ផ្ទុះ។
អគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា (CMAC) លោក ហេង រតនា បានសម្តែងការរន្ធត់ និងសោកស្តាយយ៉ាងខ្លាំងចំពោះឧប្បត្តិហេតុនេះ។ លោកបានបញ្ជាក់តាមបណ្តាញសង្គមហ្វេសប៊ុកថា ករណីនេះបណ្តាលមកពីការផ្ទុះគ្រាប់ប្រភេទ M79 (M381) ដែលជាសំណល់យុទ្ធភណ្ឌសង្គ្រាម។
ជនរងគ្រោះគឺកុមារាប្រុសអាយុ ៨ឆ្នាំម្នាក់ និងកុមារីអាយុ ១៤ឆ្នាំម្នាក់ ដែលបានរងរបួសធ្ងន់ធ្ងរ និងបានស្លាប់បាត់បង់ជីវិតនៅទីកន្លែង។ លោក ហេង រតនា បានលើកឡើងថា នេះជាទុក្ខសោកនាដកម្មមួយដែលបង្កឡើងដោយសំណល់គ្រាប់មិនទាន់ផ្ទុះនៃសង្គ្រាម ដែលអាចមានអាយុកាលជាង ៣០ ទៅ ៤០ ឆ្នាំហើយ។
“សំណល់យុទ្ធភណ្ឌទាំងនេះបន្តបង្កគ្រោះថ្នាក់ និងបំផ្លិចបំផ្លាញជីវិតប្រជាពលរដ្ឋ ជាពិសេសកុមារ និងមនុស្សជំនាន់ក្រោយៗ” លោកបានអះអាង។
ក្នុងឱកាសនោះ លោក ហេង រតនា ក៏បានបួងសួងដល់វត្ថុសក្តិសិទ្ធក្នុងលោក សូមពាំនាំវិញ្ញាណខន្តកុមារទាំងពីរ ឱ្យបានទៅកាន់ឋានសុគតិភពដោយសុខសាន្ត។
ឧប្បត្តិហេតុនេះបង្ហាញពីគ្រោះថ្នាក់ដ៏ធ្ងន់ធ្ងរនៃសំណល់យុទ្ធភណ្ឌសង្គ្រាម ដែលនៅតែបន្តគំរាមកំហែងដល់សុខសន្តិភាពប្រជាពលរដ្ឋកម្ពុជា។
ដោយ៖ តារា
