By សហរដ្ឋអាមេរិកនៅមិនទាន់ត្រៀមខ្លួនរួចរាល់សម្រាប់ការអមដំណើរកប៉ាល់ដឹកប្រេងឆ្លងកាត់ច្រកសមុទ្រ Hormuz ដែលអ៊ីរ៉ង់បានប្រកាសបិទ និងគំរាមវាយប្រហារកប៉ាល់ដឹកប្រេងណាដែលល្មើសឆ្លងកាត់។
យោងតាមការផ្សាយរបស់ Al Jazeera លោក Chris Wright រដ្ឋមន្ត្រីក្រសួងថាមពលសហរដ្ឋអាមេរិក បានប្រាប់សារព័ត៌មាន CNBC ក្នុងពេលថ្មីៗនេះថា៖ «ទីផ្សារកំពុងជួបប្រទះនឹងការរំខានរយៈពេលខ្លីដ៏ខ្លាំងក្លា យើងព្យាករណ៍ថា សង្គ្រាមនឹងបន្តរយៈពេលច្រើនសប្តាហ៍ទៀត មិនមែនច្រើនខែទេ»។
បើទោះបីជាមានការគំរាមកំហែងម្តងហើយម្តងទៀតរបស់លោក ដូណាល់ ត្រាំ ក៏ដោយ ក៏អ៊ីរ៉ង់ទទួលបានជោគជ័យស្ទើរតែទាំងស្រុងក្នុងការបិទច្រកសមុទ្រនេះ ដែលភ្ជាប់ទៅនឹងមហាសមុទ្រឥណ្ឌា។
ទោះបីយ៉ាងណា លោក Wright បានលើកឡើងពីផលប៉ះពាល់នៃវិបត្តិនេះថា៖ «វាជាការឈឺចាប់រយៈពេលខ្លី តែសម្រាប់ផលប្រយោជន៍រយៈពេលវែង។ សហរដ្ឋអាមេរិកកំពុងបំផ្លាញសមត្ថភាពរបស់អ៊ីរ៉ង់គំរាមកំហែងទីផ្សារថាមពល»។
កាលពីសប្តាហ៍មុន លោក ត្រាំ អះអាងថាកងទ័ពជើងទឹកសហរដ្ឋអាមេរិកនឹងអមដំណើរនាវាឆ្លងកាត់ច្រកសមុទ្រ Hormuz ប៉ុន្តែលោក Wright លើកឡើងកាលពីថ្ងៃព្រហស្បតិ៍ថា ចលនានេះមិនអាចកើតឡើងក្នុងពេលឥឡូវបានទេ។
លោកបន្តថា៖ «យើងមិនទាន់ត្រៀមខ្លួនរួចរាល់ទេ។ ទ្រព្យសម្បត្តិយោធារបស់យើងទាំងអស់នៅពេលនេះគឺផ្តោតលើការបំផ្លាញសមត្ថភាពវាយលុករបស់អ៊ីរ៉ង់»។
លោកបន្តទៀតថា៖ «យើងមិនចង់ឱ្យរឿងនេះក្លាយជាការផ្អាកខ្លី ឬពីរឆ្នាំនោះទេ។ យើងចង់បំផ្លាញជាអចិន្ត្រៃយ៍ ចំពោះសមត្ថភាពរបស់ពួកគេ ក្នុងការសាងសង់មីស៊ីល ការសាងសង់ផ្លូវថ្នល់ ដើម្បីមានកម្មវិធីនុយក្លេអ៊ែរ»។
ការអត្ថាធិប្បាយរបស់លោកកើតឡើងពេលដែលមេដឹកនាំកំពូលថ្មីរបស់អ៊ីរ៉ង់ គឺលោក Mojtaba Khamenei បានបញ្ជាក់ជាសាធារណៈលើកដំបូងថា ច្រកសមុទ្រ Hormuz គួរតែនៅតែបិទ អំឡុងពេលសង្គ្រាមកំពុងផ្ទុះ។
