កម្ពុជាបណ្តេញជនជាតិចិន ១៦៤នាក់ ពាក់ព័ន្ធករណីឆបោកតាមអនឡាញ

ខេត្តព្រះសីហនុ – អាជ្ញាធរកម្ពុជាកំពុងត្រៀមបណ្តេញជនជាតិចិនចំនួន ១៦៤នាក់ ដែលពាក់ព័ន្ធនឹងករណីឆបោកតាមប្រព័ន្ធបច្ចេកវិទ្យា (Scam Online) តាមច្រកព្រះលានយន្តហោះអន្តរជាតិកងកេង។

នារសៀលថ្ងៃទី១៤ ខែមីនា ឆ្នាំ២០២៦ លោកឧត្តមសេនីយ៍ឯក យូ សារុំ ប្រធាននាយកដ្ឋានស៊ើបអង្កេត និងអនុវត្តនីតិវិធី បានជួបពិភាក្សាការងារជាមួយលោកអគ្គទីប្រឹក្សាអមស្ថានទូតសាធារណរដ្ឋប្រជាមានិតចិន និងក្រុមការងារពាក់ព័ន្ធ ដើម្បីរៀបចំផែនការបណ្តេញជនជាតិចិនទាំងនេះ។

ការបណ្តេញនឹងធ្វើឡើងនៅថ្ងៃទី១៥ ខែមីនា ឆ្នាំ២០២៦ តាមប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិកងកេង។ ជនជាតិចិនទាំងនេះត្រូវបានចាប់ខ្លួនក្នុងករណីពាក់ព័ន្ធនឹងប្រព័ន្ធឆបោកតាមអនឡាញ។

បន្ទាប់ពីកិច្ចពិភាក្សា លោកឧត្តមសេនីយ៍ឯក យូ សារុំ បានសួរសុខទុក្ខកម្លាំងប្រចាំការ និងប្រជុំណែនាំអំពីការងារជំនាញ និងបទពិសោធន៍សម្រាប់អនុវត្តការងារប្រចាំថ្ងៃ ជាពិសេសការងារគ្រប់គ្រងទៅលើជនបរទេស។

អាជ្ញាធរក៏បានចុះត្រួតពិនិត្យការរៀបចំសុវត្ថិភាពតាមបន្ទប់នៃអគារស្នាក់នៅរបស់ជនបរទេសទាំងនេះផងដែរ។ ការបណ្តេញនេះធ្វើឡើងក្រោមការណែនាំពីឧត្តមសេនីយ៍ឯក សុខ វាសនា អគ្គនាយកអន្តោប្រវេសន៍។

ការបណ្តេញជនបរទេសពាក់ព័ន្ធករណីឆបោកតាមអនឡាញនេះ គឺជាផ្នែកមួយនៃយុទ្ធសាស្ត្របង្ក្រាបបទល្មើសរបស់រដ្ឋាភិបាលកម្ពុជា ដើម្បីធានាសុវត្ថិភាពសាធារណៈ និងការពារប្រជាពលរដ្ឋពីប្រព័ន្ធឆបោកអនឡាញ។

អត្ថបទសរសេរដោយ សហការី
កែសម្រួលដោយ សារ៉ា ចន្ទ