តុលាការខេត្តកំពង់ស្ពឺឃុំខ្លួន ៨នាក់ដាក់ពន្ធនាគារ ក្រោយចាប់ខ្លួននៅកន្លែងជល់មាន់

ខេត្តកំពង់ស្ពឺ៖ កម្លាំងកងរាជអាវុធហត្ថខេត្តកំពង់ស្ពឺ បានធ្វើប្រតិបត្តិការបង្ក្រាបល្បែងស៊ីសងជល់មាន់យ៉ាងជោគជ័យ ដោយឃាត់ខ្លួនជនសង្ស័យចំនួន ៨នាក់ នៅក្នុងភូមិខោប សង្កាត់រការធំ ក្រុងច្បារមន។

កាលពីថ្ងៃទី៨ ខែមីនា ឆ្នាំ២០២៦ កម្លាំងអង្គភាពនគរបាលយុត្តិធម៌ នៃបញ្ជាការដ្ឋានកងរាជអាវុធហត្ថខេត្តកំពង់ស្ពឺ បានធ្វើការបង្រ្កាបជាក់ស្តែង និងឃាត់ខ្លួនជនសង្ស័យទាំង ៨នាក់ ក្នុងប្រតិបត្តិការដែលអនុវត្តតាមបទបញ្ជាយ៉ាងម៉ឺងម៉ាត់របស់លោកឧត្តមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្ត។

ជនសង្ស័យទាំង ៨នាក់ដែលត្រូវឃាត់ខ្លួនមាន៖
១. គៀត ចាន់ធួន (៤៥ឆ្នាំ) – កសិករ
២. ឃឿន សៅឌី (៣២ឆ្នាំ) – កសិករ
៣. លឹម សាលាង (៤៣ឆ្នាំ) – កម្មកររោងចក្រ
៤. សុំ ប្រុស (៣៤ឆ្នាំ) – កម្មកររោងចក្រ
៥. ឃិន ប្រេស (៤១ឆ្នាំ) – កម្មករសំណង់
៦. យឹម សុភិន (៤៤ឆ្នាំ) – កម្មករសំណង់
៧. អៃ សុខវ៉ាន់ (៤៨ឆ្នាំ) – កសិករ
៨. អួន ភា (៤០ឆ្នាំ) – កសិករ

ក្នុងប្រតិបត្តិការនេះ កម្លាំងជំនាញបានចាប់យកវត្ថុតាងជាច្រើនរួមមាន៖ ម៉ូតូចំនួន ០៩គ្រឿង, ទូរស័ព្ទចំនួន ០៦គ្រឿង, មាន់ជល់ចំនួន ០៣ក្បាល និងជញ្ជីងថ្លឹងមាន់ចំនួន ០១។

នៅថ្ងៃទី១៥ ខែមីនា ឆ្នាំ២០២៦ ចៅក្រមសាលាដំបូងខេត្តកំពង់ស្ពឺ បានចេញដីកាសម្រេចឃុំខ្លួនជនសង្ស័យទាំង ៨នាក់ដាក់ពន្ធនាគារជាបណ្ដោះអាសន្ន ក្រោយពីបញ្ចប់នីតិវិធីសាកសួរ។

ប្រតិបត្តិការនេះធ្វើឡើងក្រោមការសម្របសម្រួលនីតិវិធីពីព្រះរាជអាជ្ញា អមសាលាដំបូងខេត្តកំពង់ស្ពឺ ដើម្បីធានានូវភាពត្រឹមត្រូវតាមច្បាប់។ បច្ចុប្បន្ន ជនសង្ស័យទាំងអស់ត្រូវបានឃុំខ្លួនដាក់ពន្ធនាគាររួចជាស្រេច។