By ខេត្តស្ទឹងត្រែង – លោក ទូច គង្គា អភិបាលរងខេត្តស្ទឹងត្រែង បានដឹកនាំក្រុមអភិបាលខេត្ត និងមន្ត្រីគណបក្សស្រុកបុរីអូរស្វាយសែនជ័យ ចូលរួមពិធីបុណ្យផ្កាប្រាក់សាមគ្គី នៅសាលាបឋមសិក្សាអន្លង់ស្វាយ (ខ) កាលពីថ្ងៃទី១៥ ខែមីនា ឆ្នាំ២០២៦។
ពិធីនេះរៀបចំឡើងដើម្បីប្រមូលថវិកាសម្រាប់កសាងសំណង់សាលារៀន ដោយរួមមានការចាក់សាបផ្លូវចូលសាលា និងកែលម្អមុខអគារថ្នាក់រៀន ព្រមទាំងបរិស្ថានជុំវិញសាលា។
លោកអភិបាលរងបានចូលរួមថវិកាផ្ទាល់ខ្លួនចំនួន ២ លានរៀល និងប្រគេនបច្ច័យដល់ព្រះសង្ឃ ៥ អង្គ និងតាអាចរ្យ សរុប ៥៥០,០០០ រៀល។ គណកម្មាធិការគណបក្សស្រុកបានចូលរួម ១,៧២០,០០០ រៀល និងក្រុមការងារចុះមូលដ្ឋានឃុំព្រះរំកិលចូលរួម ១,២០០,០០០ រៀល។
ជាសរុប ថវិកាដែលបានប្រមូលបានមានចំនួន ៥,៤៧០,០០០ រៀល ដែលនឹងត្រូវបានប្រើប្រាស់ក្នុងការកសាងសំណង់សាលារៀន ដើម្បីផ្តល់បរិស្ថានរៀនសូត្រល្អប្រសើរដល់កូនចៅខេត្តស្ទឹងត្រែង។
ពិធីនេះបានប្រព្រឹត្តិទៅក្នុងបរិវេណសាលាបឋមសិក្សាអន្លង់ស្វាយ (ខ) ស្ថិតក្នុងភូមិអន្លង់ស្វាយ ឃុំព្រះរំកិល ស្រុកបុរីអូរស្វាយសែនជ័យ ដោយមានការចូលរួមពីមន្ត្រីជាន់ខ្ពស់ និងប្រជាពលរដ្ឋក្នុងតំបន់។
ការចូលរួមរបស់មន្ត្រីរដ្ឋាភិបាលក្នុងពិធីបុណ្យផ្កាប្រាក់សាមគ្គីបង្ហាញពីការយកចិត្តទុកដាក់ចំពោះការអប់រំ និងការអភិវឌ្ឍន៍ហេដ្ឋារចនាសម្ព័ន្ធអប់រំក្នុងតំបន់។
ដោយ ៖ សិលា
