អ៊ុយក្រែនចោទសហភាពអឺរ៉ុបគំរាមកំហែង ដោយសារសំណើបើកបំពង់បង្ហូរប្រេងរុស្ស៊ី

អន្តរជាតិ៖ ប្រធានាធិបតីអ៊ុយក្រែន លោក Volodymyr Zelenskyy បានចោទប្រកាន់សម្ព័ន្ធមិត្តសហភាពអឺរ៉ុបថា កំពុងគំរាមកំហែងទីក្រុងគីវ ដើម្បីបើកបំពង់បង្ហូរប្រេងឡើងវិញ ដែលដឹកជញ្ជូនប្រេងរុស្ស៊ីទៅកាន់ប្រទេសហុងគ្រី និងស្លូវ៉ាគី។

លោក Zelenskyy បានថ្លែងថា៖ “ការស្ដារឡើងវិញនូវលំហូរប្រេងឆៅរបស់រុស្ស៊ីតាមរយៈអ៊ុយក្រែនចូលទៅក្នុងសហភាពអឺរ៉ុប នឹងដូចជាការដកទណ្ឌកម្មសេដ្ឋកិច្ចលើទីក្រុងមូស្គូដោយផ្ទាល់។”

អ៊ុយក្រែនបានបញ្ជាក់ថា បំពង់បង្ហូរប្រេង Druzhba សម័យសូវៀតត្រូវបានខូចខាតដោយការវាយប្រហារតាមអាកាសរបស់រុស្ស៊ីកាលពីខែមករា ហើយមិនទាន់ត្រូវបានជួសជុលនៅឡើយទេ។

ប្រទេសហុងគ្រីដែលពឹងផ្អែកលើថាមពលរបស់រុស្ស៊ី កំពុងរារាំងទាំងទណ្ឌកម្មថ្មីៗរបស់សហភាពអឺរ៉ុបលើទីក្រុងមូស្គូ និងប្រាក់កម្ចីដ៏សំខាន់ចំនួន៩០ ពាន់លានអឺរ៉ូ សម្រាប់ទីក្រុងគីវរហូតដល់បំពង់បង្ហូរប្រេងត្រូវបានបើកឡើងវិញ។

នាយករដ្ឋមន្ត្រីហុងគ្រី លោក Viktor Orban បានធ្វើឱ្យអរិភាពចំពោះអ៊ុយក្រែនក្លាយជាបញ្ហាសំខាន់មួយមុនការបោះឆ្នោតខែមេសាខាងមុខ។

សហភាពអឺរ៉ុបបានជំរុញឱ្យលោក Zelenskyy ជួសជុលបំពង់បង្ហូរប្រេងឱ្យបានឆាប់រហ័ស ហើយកំពុងស្នើសុំអនុញ្ញាតឱ្យក្រុមអ្នកត្រួតពិនិត្យចូលមើលការខូចខាត។ ក្រុមមន្ត្រីសហភាពអឺរ៉ុបមួយចំនួនមានការភ័យខ្លាចថា ការតស៊ូរបស់លោក Zelenskyy អាចជួយលោក Orban ឱ្យឈ្នះការបោះឆ្នោតឡើងវិញ។

លោក Zelenskyy បានបញ្ជាក់ទៀតថា៖ “ខ្ញុំគ្រាន់តែប្រឆាំងជាគោលការណ៍ចំពោះការអនុញ្ញាតឱ្យប្រេងរបស់រុស្ស៊ីឆ្លងកាត់អ៊ុយក្រែន តែប៉ុណ្ណោះ។” ការអត្ថាធិប្បាយនេះបានកើតឡើងបន្ទាប់ពីអាមេរិកបានបន្ធូរបន្ថយទណ្ឌកម្មលើប្រេងរុស្ស៊ី។