គុនខ្មែរឆ្ពោះទៅអន្តរជាតិ! វៀតណាមទទួលសិទ្ធិរៀបចំព្រឹត្តិការណ៍ជ្រើសរើសជើងឯកអាស៊ី

ហូជីមិញ, វៀតណាម – សហព័ន្ធគុនខ្មែរអន្តរជាតិបានធ្វើជំហានដ៏សំខាន់ក្នុងការពង្រឹងឥទ្ធិពលគុនខ្មែរនៅលើឆាកអន្តរជាតិ តាមរយៈការចុះអនុស្សរណៈយោគយល់ជាមួយប្រទេសវៀតណាម។

កាលពីថ្ងៃទី១២ ខែមីនា ឯកឧត្តមខូវ ឆាយ អគ្គលេខាធិការសហព័ន្ធកីឡាប្រដាល់គុនខ្មែរអន្តរជាតិ បានធ្វើជាសក្ខីភាពក្នុងការចុះអនុស្សរណៈយោគយល់ដ៏សំខាន់នៅទីក្រុងហូជីមិញ។ កិច្ចសន្យានេះបានផ្ដល់សិទ្ធិឱ្យសហព័ន្ធគុនខ្មែរអន្តរជាតិប្រចាំប្រទេសវៀតណាម ធ្វើជាម្ចាស់ផ្ទះរៀបចំព្រឹត្តិការណ៍ប្រកួតប្រដាល់គុនខ្មែរជ្រើសរើសជើងឯកទ្វីបអាស៊ី លើកទី១ ឆ្នាំ២០២៦។

ព្រឹត្តិការណ៍ The 1st Kunkhmer Asian Championship នេះគ្រោងប្រព្រឹត្តិទៅនៅថ្ងៃទី៥ ដល់ថ្ងៃទី១១ ខែកក្កដា ឆ្នាំ២០២៦ នៅខេត្តកឹងថី ប្រទេសវៀតណាម។

ទន្ទឹមជាមួយគ្នានេះដែរ ឯកឧត្តមខូវ ឆាយ ក៏បានចុះអនុស្សរណៈជាមួយក្រុមហ៊ុនបណ្ដាញព័ត៌មានកីឡាប្រយុទ្ធអន្តរជាតិ Searike Network ដើម្បីពង្រឹងនិងពង្រីកការផ្សព្វផ្សាយគុនខ្មែរនៅទូទាំងតំបន់អាស៊ីអាគ្នេយ៍និងលើឆាកអន្តរជាតិ។

បន្ទាប់ពីការចុះអនុស្សរណៈ ភាគីទាំងពីរបានឯកភាពក្នុងការរៀបចំព្រឹត្តិការណ៍ប្រកួតកម្រិតអន្តរជាតិរៀងរាល់៣ខែម្ដង នៅលើសង្វៀន The Grand Ho Tram ក្នុងខេត្តវុងតាវ ប្រទេសវៀតណាម។

ឯកឧត្តមខូវ ឆាយ បានបញ្ជាក់ថា៖ “ការចុះអនុស្សរណៈនេះគឺជាជំហានដ៏សំខាន់មួយក្នុងការពង្រីកឥទ្ធិពលនិងការទទួលស្គាល់គុនខ្មែរជាកីឡាប្រយុទ្ធអត្តសញ្ញាណរបស់ជាតិខ្មែរឱ្យកាន់តែទូលំទូលាយនៅក្នុងតំបន់និងលើពិភពលោក។”

សហព័ន្ធកីឡាប្រដាល់គុនខ្មែរអន្តរជាតិនឹងបន្តសហការជាមួយបណ្ដាប្រទេសជាសមាជិកនិងដៃគូអន្តរជាតិនានា ដើម្បីជំរុញការអភិវឌ្ឍ ការរៀបចំព្រឹត្តិការណ៍ និងការផ្សព្វផ្សាយគុនខ្មែរឱ្យក្លាយជាកីឡាប្រយុទ្ធដ៏ល្បីល្បាញនៅលើឆាកអន្តរជាតិ។