By 
នាយករដ្ឋមន្ត្រីជប៉ុន លោកស្រី សាណាអេ តាកាអ៊ិឈិ បានប្រកាសជាផ្លូវការថា ប្រទេសជប៉ុនគ្មានគម្រោងបញ្ជូននាវាចម្បាំង និងកងទ័ពជើងទឹកទៅអមដំណើរនាវាដឹកប្រេងនៅមជ្ឈិមបូព៌ាឡើយ។ ការប្រកាសនេះធ្វើឡើងបន្ទាប់ពីប្រធានាធិបតីអាមេរិក លោក ដូណាល់ ត្រាំ បានអំពាវនាវដល់សម្ព័ន្ធមិត្តឱ្យចូលរួមការពារនាវាដឹកប្រេងដែលឆ្លងកាត់ច្រកសមុទ្រ Hormuz។
លោកស្រី តាកាអ៊ិឈិ បានប្រាប់សភាជប៉ុនយ៉ាងច្បាស់ថា៖ «យើងមិនទាន់បានធ្វើការសម្រេចចិត្តអ្វីទាំងអស់ ពីការបញ្ជូននាវាអមដំណើរទៅមជ្ឈិមបូព៌ា។ យើងកំពុងបន្តពិនិត្យមើលអ្វីដែលជប៉ុនអាចធ្វើបានដោយឯករាជ្យ និងអ្វីដែលអាចធ្វើបាននៅក្នុងក្របខ័ណ្ឌច្បាប់»។ ការប្រកាសនេះត្រូវបានផ្សព្វផ្សាយដោយភ្នាក់ងារ Reuters នៅថ្ងៃទី១៦ ខែមីនា ឆ្នាំ២០២៦។
ការអំពាវនាវរបស់លោក ដូណាល់ ត្រាំ ត្រូវបានធ្វើឡើងតាមរយៈបណ្តាញសង្គម ដោយអំពាវនាវដល់សម្ព័ន្ធមិត្តអាមេរិក រួមទាំងប្រទេសជប៉ុន ដើម្បីទៅជួយការពារនាវាដឹកជញ្ជូនប្រេង និងឧស្ម័នតាមផ្លូវទឹកយុទ្ធសាស្ត្រដ៏សំខាន់នេះ។
ស្ថានភាពនេះធ្វើឱ្យទីក្រុងតូក្យូស្ថិតក្នុងស្ថានភាពលំបាក ដោយសារប្រទេសជប៉ុនពឹងផ្អែកយ៉ាងខ្លាំងទៅលើថាមពលពីមជ្ឈិមបូព៌ា។ កងកម្លាំងការពារដែនសមុទ្រជប៉ុនបានធ្វើប្រតិបត្តិការប្រឆាំងចោរសមុទ្រក្នុងដែនទឹកជិតមជ្ឈិមបូព៌ា ប៉ុន្តែបេសកកម្មទាំងនេះគ្រាន់តែជាប្រតិបត្តិការត្រួតពិនិត្យប៉ុណ្ណោះ។
លោកស្រី តាកាអ៊ិឈិ នឹងធ្វើដំណើរទៅកាន់ទីក្រុងវ៉ាស៊ីនតោននៅសប្តាហ៍នេះ ដើម្បីពិភាក្សាជាមួយលោក ត្រាំ ហើយលោកស្រីបានបញ្ជាក់ថានឹងនិយាយពីជម្លោះជាមួយអ៊ីរ៉ង់ផងដែរ។ លោកស្រីបានប្រាប់អ្នកតាក់តែងច្បាប់ថា៖ «ខ្ញុំចង់ចូលរួមក្នុងការពិភាក្សាដ៏រឹងមាំដោយផ្អែកលើទស្សនៈ និងជំហររបស់ប្រទេសជប៉ុនទាក់ទងនឹងតម្រូវការ ដើម្បីបន្ធូរបន្ថយភាពតានតឹងឱ្យបានឆាប់បំផុត»។
