By ភ្នំពេញ – ក្រសួងកសិកម្ម រុក្ខាប្រមាញ់ និងនេសាទ និងក្រសួងបរិស្ថាន បានសហការជាមួយអង្គការសត្វព្រៃនិងរុក្ខជាតិ អង្គការគាំពារធនធានសមុទ្រ និងមូលនិធិសង្សារ ប្រកាសពីការរកឃើញការបង្កកំណើតផ្កាថ្មប៉ប្រះទឹកជាលើកទី៣ នៅប្រជុំកោះរ៉ុង និងជាលើកដំបូងនៅកោះសង្សារ ខេត្តព្រះសីហនុ និងប្រជុំកោះស្តេច ខេត្តកោះកុង។
ការសិក្សាស្រាវជ្រាវនេះបានធ្វើឡើងចាប់ពីថ្ងៃទី៧ ដល់ទី៩ ខែមីនា ឆ្នាំ២០២៦ ដោយមានការគាំទ្រពីដៃគូជាច្រើន រួមមាន Bubbles Up Dive Centre និង Khmer Dive Group។ អ្នកស្រាវជ្រាវបានធ្វើការមុជទឹកពេលយប់ ដើម្បីតាមដានសកម្មភាពបង្កកំណើតរបស់ផ្កាថ្ម។
កញ្ញា Jun Cheng ប្រធានគ្រប់គ្រងជាន់ខ្ពស់នៃកម្មវិធីអភិរក្សតំបន់ឆ្នេរ និងសមុទ្រ បានមានប្រសាសន៍ថា៖ “ការរកឃើញការបង្កកំណើតរបស់ផ្កាថ្មរយៈពេលបីឆ្នាំជាប់ៗគ្នា គឺជាសញ្ញាដ៏ល្អមួយ ដែលបង្ហាញថាផ្កាថ្មប៉ប្រះទឹកនៅកម្ពុជានៅតែមានភាពធន់គួរឱ្យកត់សម្គាល់។”
ឯកឧត្តម អ៊ាង សុផល្លែត រដ្ឋមន្ត្រីក្រសួងបរិស្ថាន បានអះអាងថា៖ “ភាពជោគជ័យនេះបង្ហាញពីលទ្ធផលនៃកិច្ចខិតខំប្រឹងប្រែងអភិរក្ស និងគ្រប់គ្រងជាបន្តបន្ទាប់នៅក្នុងតំបន់ការពារសមុទ្ររបស់កម្ពុជា។”
ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានបន្ថែមថា៖ “លទ្ធផល៣ឆ្នាំជាប់ៗគ្នានេះ ជាសក្ខីភាពបង្ហាញថា សមុទ្ររបស់យើងកំពុងមានសុខភាពល្អ។ យើងមិនគ្រាន់តែមានគោលនយោបាយលើក្រដាសទេ តែយើងមានលទ្ធផលជាក់ស្តែងនៅក្នុងសមុទ្រ។”
ការស្រាវជ្រាវនេះបានផ្តល់ទិន្នន័យវិទ្យាសាស្ត្រសំខាន់ៗ ដែលជួយក្នុងការយល់ដឹងអំពីវដ្តបន្តពូជរបស់ផ្កាថ្ម និងកត្តាដែលរួមចំណែកដល់ការគ្រប់គ្រងប្រកបដោយប្រសិទ្ធភាព។
ផ្កាថ្មប៉ប្រះទឹកដែលមានសុខភាពល្អ មានសារៈសំខាន់ខ្លាំងក្នុងការធានានិរន្តរភាពធនធានជលផល និងគាំទ្រដល់ជីវភាពរស់នៅរបស់សហគមន៍តាមតំបន់ឆ្នេរសមុទ្រ។
ក្រុមការងារនឹងបន្តសិក្សាស្រាវជ្រាវទិន្នន័យដែលប្រមូលបាន ដើម្បីពង្រឹងការគ្រប់គ្រងធនធានសមុទ្រ និងធានាថាជីវៈចម្រុះសមុទ្រនៅកម្ពុជាបន្តកើនឡើង។
