អុីរ៉ង់ដាក់ពង្រាយមីស៊ីលយុទ្ធសាស្ត្រថ្មី Sejjil វាយប្រហារអុីស្រាអែលជាលើកដំបូង

កងឆ្មាំបដិវត្តន៍អ៊ិស្លាមអុីរ៉ង់ (IRGC) បានធ្វើការវាយប្រហារយ៉ាងធ្ងន់ធ្ងរលើទីតាំងយោធាអុីស្រាអែល ដោយដាក់ពង្រាយមីស៊ីលយុទ្ធសាស្ត្រឥន្ធនៈរឹង Sejjil ជាលើកដំបូងក្នុងប្រវត្តិសាស្ត្រ។

ការវាយប្រហារនេះបានកើតឡើងនៅថ្ងៃអាទិត្យ (១៥ មីនា) ដែលជាផ្នែកនៃប្រតិបត្តិការ True Promise 4 និងជាការវាយប្រហារលើកទី៥៤ ដោយមីស៊ីលសងសឹករបស់ IRGC។ ការវាយប្រហារថ្មីនេះរួមមានការបាញ់មីស៊ីលធុនធ្ងន់ Khorramshahr ដែលបំពាក់ដោយក្បាលគ្រាប់ទម្ងន់ពីរតោន រួមជាមួយមីស៊ីល Khaybar-shekan, Qadr និង Emad។

ជាពិសេស IRGC បានបញ្ជាក់ថា នេះជាលើកដំបូងដែលអុីរ៉ង់បានដាក់ពង្រាយមីស៊ីលផ្លោងឥន្ធនៈរឹង Sejjil ដោយផ្តោតលើមជ្ឈមណ្ឌលបញ្ជាការកងទ័ពអាកាសអុីស្រាអែល។ គោលដៅទាំងនោះរួមមានហេដ្ឋារចនាសម្ព័ន្ធយោធាសំខាន់ៗ និងតំបន់ដែលមានកងកម្លាំងយោធាប្រមូលផ្តុំ។

ការប្រើប្រាស់មីស៊ីល Sejjil ត្រូវបានគេមើលឃើញថាជាការកើនឡើងគួរឱ្យកត់សម្គាល់នៅក្នុងជម្លោះយោធាមជ្ឈិមបូព៌ា។ មីស៊ីល Sejjil គឺជាមីស៊ីលផ្លោងឥន្ធនៈរឹងពីរដំណាក់កាល ដែលត្រូវបានគេស្គាល់ផងដែរថាជា Sajjil, Ashoura ឬ Ashura។ កំណែ Sejjil-2 មានចម្ងាយប្រហែល ២,០០០ គីឡូម៉ែត្រ និងសមត្ថភាពផ្ទុកប្រហែល ៧០០ គីឡូក្រាម។

ការវាយប្រហារនេះបង្ហាញពីការកើនឡើងនៃភាពតានតឹងក្នុងតំបន់ និងសមត្ថភាពយោធាដែលកំពុងអភិវឌ្ឍន៍របស់អុីរ៉ង់។ នៅក្នុងការវាយប្រហារពីមុនៗ អុីរ៉ង់បានប្រើប្រាស់មីស៊ីលផ្លោងដូចជា Khorramshahr និង Emad ជាចម្បង ប៉ុន្តែមិនទាន់បានដាក់ពង្រាយប្រព័ន្ធមីស៊ីល Sejjil នៅឡើយទេ។

ដោយ៖ ធីរីណា