លោក កែវ រ៉េមី៖ សាមគ្គីភាពជាកម្លាំងពិតប្រាកដនៃប្រទេសជាតិ

ភ្នំពេញ៖ លោក កែវ រ៉េមី ទេសរដ្ឋមន្ត្រី និងជាប្រធានគណៈកម្មាធិការសិទ្ធិមនុស្សកម្ពុជា បានចែករំលែកគំនិតយ៉ាងសំខាន់តាមបណ្តាញសង្គមអំពីកត្តាដែលធ្វើឲ្យប្រទេសមួយមានភាពរឹងមាំ។

លោកបានចង្អុលបង្ហាញថា ប្រទេសជាតិមួយខ្លាំង និងរឹងមាំ គឺមិនមែនអាស្រ័យតែលើកងទ័ពឬសេដ្ឋកិច្ចប៉ុណ្ណោះទេ ប៉ុន្តែអាស្រ័យលើប្រជាជនដែលមានការសាមគ្គីគ្នា និងស្រឡាញ់ជាតិរបស់ខ្លួន។

“ប្រទេសខ្លាំង មិនមែនត្រឹមតែមានកងទ័ព ឬសេដ្ឋកិច្ចរឹងមាំប៉ុណ្ណោះទេ ប៉ុន្តែត្រូវមានប្រជាជនដែលមានស្មារតីការពារជាតិ និងយល់ដឹងពីតម្លៃនៃឯករាជ្យភាពផងដែរ។” លោកបានបញ្ជាក់។

លោកបានពន្យល់បន្ថែមថា ប្រទេសខ្លាំងគឺជាប្រទេសដែលមានប្រជាជនចេះគោរពច្បាប់ មានវិន័យ មានការអប់រំល្អ និងចេះរួមគ្នាការពារផលប្រយោជន៍ជាតិ។ ផ្ទុយទៅវិញ ប្រទេសខ្សោយគឺជាប្រទេសដែលមានការបែកបាក់ផ្ទៃក្នុង ខ្វះសាមគ្គីភាព ខ្វះមនសិកាជាតិ និងមិនយល់ដឹងពីតម្លៃនៃជាតិរបស់ខ្លួន។

“កម្លាំងពិតប្រាកដនៃប្រទេសមួយ មិនមែនស្ថិតលើតែអាវុធ ឬអំណាចនយោបាយប៉ុណ្ណោះទេ ប៉ុន្តែស្ថិតលើស្មារតី សាមគ្គីភាព និងការរួមចំណែករបស់ប្រជាជនទាំងអស់ក្នុងការកសាង និងការពារប្រទេសជាតិឲ្យបានរឹងមាំឲ្យមានការរីកចម្រើន។” លោកបានសង្កត់ធ្ងន់។

ការលើកឡើងនេះបានទទួលការឆ្លើយតបយ៉ាងខ្លាំងពីសាធារណជនតាមបណ្តាញសង្គម ដោយមានមតិជាច្រើនយល់ស្របពីសារៈសំខាន់នៃសាមគ្គីភាពជាតិក្នុងការអភិវឌ្ឍប្រទេស។

ដោយ៖ សិលា