By ឆ្នាំ២០២៥ ខេត្តក្រចេះ បានជួបប្រទះនឹងគ្រោះធម្មជាតិច្រើនប្រភេទ រួមមានទឹកជំនន់ រាំងស្ងួត ខ្យល់កន្ត្រាក់ រន្ទះបាញ់ និងអគ្គីភ័យ ដែលប៉ះពាល់យ៉ាងធ្ងន់ធ្ងរដល់ការរស់នៅ និងជីវភាពប្រជាពលរដ្ឋ។
លោក ឌួង ពៅ អភិបាលរងខេត្តក្រចេះ បានចេញមុខបញ្ជាក់ក្នុងកិច្ចប្រជុំសង្ខេបលទ្ធផលការងារគ្រប់គ្រងគ្រោះមហន្តរាយ នាថ្ងៃទី១៦ ខែមិនា ឆ្នាំ២០២៦។ លោកបានឱ្យដឹងថា គ្រោះមហន្តរាយទាំងនេះបានប៉ះពាល់ដល់ឃុំ-សង្កាត់ចំនួន ៣៩ ក្នុង៧ស្រុក-ក្រុង រួមមាន១៨៩ភូមិ។
ពលរដ្ឋជាង ១២,៥៦១ គ្រួសារបានរងផលប៉ះពាល់ ដោយមានការខូចខាតដំណាំស្រូវសន្ទូង និងស្រូវពង្រោះចំនួន ៥,៨២៣ហិកតា និងដំណាំរួមផ្សំ ៤,៥២៤ហិកតា។ មានការជម្លៀសប្រជាពលរដ្ឋចំនួន ៤០៥គ្រួសារ ទៅកាន់ទីទួលខ្ពស់ៗ។
ក្រោយពីគ្រោះមហន្តរាយ មានការខូចខាតហេដ្ឋារចនាសម្ព័ន្ធយ៉ាងធ្ងន់ធ្ងរ៖ សាលារៀន ៣៣កន្លែង មណ្ឌលសុខភាព ២កន្លែង វត្តអារាម ១៣កន្លែង អណ្តូង ៧០៥អណ្តូង និងផ្លូវលំលិចប្រវែង ១៧៤,៣២៥ម៉ែត្រ។
គ្រោះអគ្គីភ័យកើតឡើង ២២លើក បណ្តាលឱ្យឆេះផ្ទះប្រជាពលរដ្ឋ ២០ខ្នង និងវិហារសាសនា ១កន្លែង។ ចំណែកឯខ្យល់កន្ត្រាក់បានប៉ះពាល់ដល់ ៣៤ភូមិ និងផ្ទះប្រជាពលរដ្ឋ ២៤៩ខ្នង។ រន្ទះបាញ់បណ្តាលឱ្យមានមនុស្សស្លាប់ ២នាក់ និងគោងាប់ ៦ក្បាល។
ទន្ទឹមនឹងនោះ អង្គការ PIN ដោយមានការគាំទ្រពី UNDP និងសាធារណរដ្ឋកូរ៉េ បានអនុវត្តគម្រោងពង្រឹងការគ្រប់គ្រងធនធានទឹក និងភាពធន់ទៅនឹងអាកាសធាតុនៅតំបន់ងាយរងគ្រោះ។ គម្រោងនេះបានផ្តល់សម្ភារសង្គ្រោះជាច្រើន រួមមានទូក ម៉ាស៊ីនបូមទឹក អាវកាក់សុវត្ថិភាព និងសម្ភារសង្គ្រោះបឋមផ្សេងៗទៀត។
រដ្ឋបាលខេត្តក្រចេះក៏បានរៀបចំផែនការត្រៀមបម្រុងសម្រាប់ការឆ្លើយតបសង្គ្រោះបន្ទាន់គ្រោះមហន្តរាយទឹកជំនន់ និងរាំងស្ងួតឆ្នាំ២០២៦ ដើម្បីកាត់បន្ថយផលប៉ះពាល់ដល់ប្រជាពលរដ្ឋ។
