បារាំងដាក់សម្ពាធអ៊ីរ៉ង់ ទាមទារបញ្ឈប់ការវាយប្រហារ និងហាមឃាត់អាវុធនុយក្លេអ៊ែរ

ប្រធានាធិបតីបារាំង លោក អេម៉ានូអែល ម៉ាក្រុង បានដាក់សម្ពាធយ៉ាងខ្លាំងទៅលើអ៊ីរ៉ង់ ដោយទាមទារឲ្យបញ្ឈប់ការវាយប្រហារទាំងផ្ទាល់ និងតាមរយៈក្រុមសកម្មប្រយុទ្ធនៅតំបន់។ ការទាមទារនេះមកបន្ទាប់ពីទាហានបារាំងម្នាក់ត្រូវបានសម្លាប់ក្នុងការវាយប្រហារដោយយន្តហោះគ្មានមនុស្សបើកនៅអ៊ីរ៉ាក់។

ក្នុងការហៅទូរស័ព្ទទៅប្រធានាធិបតីអ៊ីរ៉ង់ លោក Masoud Pezeshkian កាលពីថ្ងៃអាទិត្យទី១៥មីនា លោកម៉ាក្រុងបានបញ្ជាក់យ៉ាងច្បាស់ថា៖ «ប្រទេសបារាំងកំពុងធ្វើសកម្មភាពក្នុងក្របខ័ណ្ឌការពារយ៉ាងតឹងរ៉ឹង ដើម្បីការពារផលប្រយោជន៍របស់ខ្លួន ដៃគូក្នុងតំបន់ និងសេរីភាពនាវាចរណ៍។ វាមិនអាចទទួលយកបានទេសម្រាប់ប្រទេសរបស់យើងក្នុងការក្លាយជាគោលដៅ»។

លោកម៉ាក្រុងក៏បានសង្កត់ធ្ងន់ពីតម្រូវការស្ដារសេរីភាពនាវាចរណ៍នៅច្រកសមុទ្រ Hormuz ដោយបន្ថែមថា៖ «មានតែក្របខ័ណ្ឌនយោបាយ និងសន្តិសុខថ្មីមួយប៉ុណ្ណោះ ដែលអាចធានាសន្តិភាពសម្រាប់ទាំងអស់គ្នា។ ការរៀបចំបែបនេះត្រូវតែធានាថា អ៊ីរ៉ង់មិនមានអាវុធនុយក្លេអ៊ែរឡើយ»។

ការសម្លាប់ទាហានបារាំងម្នាក់ និងការរបួសរបស់ទាហានបារាំង៦នាក់ទៀតនៅតំបន់ស្វយ័ត Kurdistan របស់អ៊ីរ៉ាក់ កាលពីថ្ងៃទី១៣មីនា បានជំរុញឱ្យមានការទាមទារយ៉ាងតឹងរ៉ឹងនេះ។ នេះជាការស្លាប់ និងរបួសដំបូងរបស់កងទ័ពបារាំងតាំងពីការផ្ទុះឡើងនៃជម្លោះមជ្ឈិមបូព៌ានៅចុងខែកុម្ភៈ។

អត្ថបទ៖ សាង ស្រីល័ក្ខ