By ខេត្តស្វាយរៀង៖ គ្រោះអគ្គីភ័យធំមួយបានកើតឡើងនៅព្រលឹមថ្ងៃអង្គារ នៅផ្សារវាលយន្ត ដោយឆេះបំផ្លាញតូបលក់ដូរឥវ៉ាន់ចំនួន១៨តូប របស់អាជីវករចំនួន១៤នាក់។
យោងតាមកងរាជអាវុធហត្ថខេត្តស្វាយរៀង ហេតុការណ៍នេះកើតឡើងនៅវេលាម៉ោង ៣:៣០នាទីព្រឹក ថ្ងៃអង្គារ ទី១៧ ខែមីនា ឆ្នាំ២០២៦ នៅផ្សារវាលយន្ត សង្កាត់ស្វាយរៀង។ កម្លាំងសមត្ថកិច្ចបានចុះអន្តរាគមន៍យ៉ាងរហ័ស ដោយប្រើរថយន្តពន្លត់អគ្គីភ័យចំនួន៨គ្រឿង និងទឹកចំនួន២២រថយន្ត។
បន្ទាប់ពីការតស៊ូរហូតដល់ម៉ោង ៦:២៥នាទីព្រឹក ស្ថានការណ៍ទើបត្រូវបានគ្រប់គ្រងដោយសុវត្ថិភាព។ គ្រោះថ្នាក់នេះបណ្តាលមកពីការឆ្លងចរន្តអគ្គិសនី ប៉ុន្តែសំណាងល្អដែលគ្មានអ្នករងគ្រោះថ្នាក់ឡើយ។
តូបដែលខូចខាតភាគច្រើនជាតូបលក់ដូរគ្រឿងក្រអូប និងឥវ៉ាន់ចាបហួយ។ កម្លាំងសមត្ថកិច្ចដែលចូលរួមរួមមានកងរាជអាវុធហត្ថខេត្ត នគរបាលខេត្ត នគរបាលក្រុង និងនគរបាលស្រុកស្វាយទាប។
អាជីវករដែលមានតូបនៅក្នុងផ្សារបានប្រមូលយកទ្រព្យសម្បត្តិរបស់ខ្លួនយ៉ាងរហ័ស ខណៈកម្លាំងសមត្ថកិច្ចកំពុងពន្លត់អគ្គីភ័យ។ ការខូចខាតសរុបកំពុងត្រូវបានគណនាឡើងវិញដោយកម្លាំងជំនាញ។
