By ភ្នំពេញ៖ ប្រជាពលរដ្ឋបានប្រទះឃើញសពបុរសជនបរទេសម្នាក់ ដែលត្រូវគេរុំក្រណាត់យ៉ាងតឹង និងមានក្រម៉ាចងជើង បោះចោលនៅលើដីឡូតិ៍ទំនេរមួយកន្លែង ក្នុងខណ្ឌសែនសុខ រាជធានីភ្នំពេញ នៅព្រឹកថ្ងៃទី១៧ ខែមីនា ឆ្នាំ២០២៦។
ហេតុការណ៍នេះបានកើតឡើងនៅវេលាម៉ោងប្រមាណ ៣:៣០នាទីទៀបភ្លឺ តាមបណ្តោយផ្លូវបេតុង ម្តុំអគ្គិសនីក្រាំងធ្នង់ សង្កាត់ក្រាំងធ្នង់។ ប្រជាពលរដ្ឋបានរាយការណ៍ថា ពួកគេបានឃើញវត្ថុសង្ស័យមួយត្រូវបានគេបោះចោល ហើយពេលចូលទៅពិនិត្យជិត បានភ្ញាក់ផ្អើលយ៉ាងខ្លាំងនៅពេលដឹងថាជាសពមនុស្ស។
ក្រោយទទួលបានព័ត៌មាន កម្លាំងសមត្ថកិច្ចមូលដ្ឋាន និងជំនាញពាក់ព័ន្ធបានចុះមកដល់ទីតាំងកើតហេតុ ហើយបានធ្វើការហ៊ុមព័ទ្ធខ្សែសុវត្ថិភាពជុំវិញតំបន់ ដើម្បីឲ្យក្រុមជំនាញកោសល្យវិច័យធ្វើការត្រួតពិនិត្យលម្អិតលើសព។
ការពិនិត្យដំបូងបង្ហាញថា សពបុរសរងគ្រោះជាជនបរទេស ត្រូវបានរុំដោយក្រណាត់យ៉ាងតឹង និងមានការចងជើងដោយក្រម៉ា ដែលបង្កឲ្យមានការសង្ស័យខ្លាំងថា អាចជាករណីឃាតកម្ម មុននឹងយកមកបោះចោលនៅទីតាំងខាងលើ ដើម្បីបំបាត់ភស្តុតាង។
សពត្រូវបានដឹកយកទៅរក្សាទុកនៅវត្តទឹកថ្លា ដើម្បីបន្តការធ្វើកោសល្យវិច័យបន្ថែម និងស្វែងរកសាច់ញាតិមកទទួលយក។ សមត្ថកិច្ចកំពុងបន្តការស្រាវជ្រាវយ៉ាងសកម្ម ដើម្បីកំណត់អត្តសញ្ញាណជនរងគ្រោះ និងស្វែងរកជនសង្ស័យពាក់ព័ន្ធ មកផ្តន្ទាទោសតាមនីតិវិធីច្បាប់។
