By ភាគីចិនបានបញ្ជាក់យ៉ាងច្បាស់ថា ការពន្យារពេលនៃដំណើរទស្សនកិច្ចរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ ទៅកាន់ទីក្រុងប៉េកាំង គឺជារឿងដាច់ដោយឡែកពីបញ្ហាច្រកសមុទ្រ Hormuz ដែលគ្រប់គ្រងដោយអ៊ីរ៉ង់។
អ្នកនាំពាក្យក្រសួងការបរទេសចិន លោក Lin Jian បានថ្លែងក្នុងសន្និសីទសារព័ត៌មាននៅថ្ងៃអង្គារទី១៧មីនា ថា៖ «យើងបានកត់សម្គាល់ឃើញថា ភាគីអាមេរិកបានបញ្ជាក់ជាសាធារណៈអំពីរបាយការណ៍មិនពិតទាំងនេះ។ ជាក់ស្ដែង របាយការណ៍ពាក់ព័ន្ធគឺខុសទាំងស្រុង ដំណើរទស្សនកិច្ចនេះមិនមានអ្វីទាក់ទងនឹងបញ្ហានៃការបើកច្រកសមុទ្រ Hormuz ទេ។»
ការឆ្លើយតបរបស់ភាគីចិននេះ ស្របពេលដែលមានព័ត៌មានថា លោកត្រាំមានគម្រោងទៅទស្សនកិច្ចនៅចុងខែមីនា និងដើមខែមេសា ប៉ុន្តែក្រោយមកមានការរាយការណ៍ថា ភាគីសហរដ្ឋអាមេរិកបានស្នើសុំឲ្យចិនពន្យារពេលសម្រាប់ជំនួបកំពូលជាមួយមេដឹកនាំចិន លោក ស៊ី ជិនពីង។
លោក Lin Jian បានបន្តថា ទាំងចិននិងសហរដ្ឋអាមេរិកកំពុងរក្សាការទំនាក់ទំនងនឹងកាលបរិច្ឆេទនៃដំណើរទស្សនកិច្ចដែលអាចកើតមានរបស់ប្រធានាធិបតីអាមេរិក ដូណាល់ ត្រាំ ទៅកាន់ប្រទេសចិន ប៉ុន្តែមិនបានផ្តល់ព័ត៌មានលម្អិតបន្ថែមណាមួយឡើយ។
រដ្ឋមន្ត្រីក្រសួងហិរញ្ញាវត្ថុអាមេរិក លោក Scott Bessent បានបដិសេធការអះអាងថា ការភ្ជាប់កិច្ចប្រជុំទៅនឹងការទាមទាររបស់លោកត្រាំសម្រាប់ប្រទេសចិន ដើម្បីជួយបើកផ្លូវទឹកឡើងវិញ គឺជា «ការនិទានរឿងមិនពិត»។
ទីក្រុងវ៉ាស៊ីនតោនបានបញ្ជាក់ថា លោកត្រាំនឹងទៅទស្សនកិច្ចប្រទេសចិនចាប់ពីថ្ងៃទី៣១ខែមីនា ដល់ថ្ងៃទី២ខែមេសា ដើម្បីកំណត់ទំនាក់ទំនងឡើងវិញ និងពង្រីកកិច្ចព្រមព្រៀងក្នុងជម្លោះពាណិជ្ជកម្មរវាងសហរដ្ឋអាមេរិក និងចិន។
ទោះជាយ៉ាងណាក៏ដោយ ទីក្រុងប៉េកាំងមិនទាន់បានបញ្ជាក់ពីកាលបរិច្ឆេទទាំងនោះ ស្របតាមការអនុវត្តធម្មតារបស់ខ្លួន។
