By ខេត្តស្ទឹងត្រែង – ត្រីបបែលយក្សដ៏ល្បីល្បាញរបស់កម្ពុជា ដែលត្រូវបានគេស្គាល់ថា «បូណ៌មី» កំពុងទទួលបានការតាមដានយ៉ាងជិតស្និទ្ធពីមន្ត្រីជំនាញ នៅក្នុងតំបន់ភូមិសាស្ត្រខេត្តស្ទឹងត្រែង។
ព័ត៌មាននេះត្រូវបានលោក សរ សុពុត្រា អភិបាលខេត្តស្ទឹងត្រែង បញ្ជាក់ក្នុងពិធីសម្ភាសន៍ពិសេសមួយ នៅថ្ងៃទី១៧ ខែមីនា ឆ្នាំ២០២៦ ដែលរៀបចំឡើងដោយក្លឹបអ្នកកាសែតកម្ពុជា ក្រោមការដឹកនាំរបស់លោក ពុយ គា។
ត្រីបបែលយក្សនេះ ដែលមានទម្ងន់រហូតដល់៣០០គីឡូក្រាម បានក្លាយជាត្រីទឹកសាបធំបំផុតនៅលើពិភពលោក បន្ទាប់ពីត្រូវបានកត់ត្រាក្នុងសៀវភៅកំណត់ត្រាពិភពលោក (GUINNESS WORLD RECORDS) កាលពីឆ្នាំ២០២៣។
ឈ្មោះ «បូណ៌មី» ត្រូវបានផ្តល់ឱ្យដោយក្រុមអ្នកស្រាវជ្រាវ ដោយសារតែត្រីនេះត្រូវបានលែងចូលទៅក្នុងទន្លេមេគង្គវិញ នៅថ្ងៃពេញបូណ៌មី។ លទ្ធផលការស្រាវជ្រាវបច្ចុប្បន្នបង្ហាញថា បូណ៌មី នៅតែស្ថិតនៅក្នុងអន្លង់ដដែលដែលអ្នកនេសាទបានចាប់វាកាលពីមុន។
លោក សរ សុពុត្រា បានពន្យល់ថា ការតាមដាននេះគឺជាផ្នែកមួយនៃការអភិវឌ្ឍន៍សក្តានុពលទេសចរណ៍ធម្មជាតិនៅខេត្តស្ទឹងត្រែង ដោយយកត្រីដ៏ពិសេសនេះធ្វើជានិមិត្តរូបនៃអច្ឆរិយភាពធម្មជាតិរបស់កម្ពុជា។
អាជ្ញាធរខេត្តបានរៀបចំផែនការការពារបរិស្ថាន និងការស្រាវជ្រាវបន្ថែមទៀត ដើម្បីធានាបាននូវសុវត្ថិភាព និងការរស់រានមានជីវិតរបស់ត្រីយក្សនេះ ដែលបានក្លាយជាស្នាដៃធម្មជាតិដ៏មានតម្លៃសម្រាប់ប្រទេស។
ការកត់ត្រាពិភពលោកនេះ បានធ្វើឱ្យត្រីបបែលយក្ស «បូណ៌មី» ក្លាយជានិមិត្តរូបថ្មីមួយនៃធនធានធម្មជាតិរបស់កម្ពុជា និងជាការទាក់ទាញដ៏សំខាន់សម្រាប់អ្នកទេសចរណ៍ដែលចាប់អារម្មណ៍លើជីវចម្រុះ។
ដោយ៖ តារា
