សហរដ្ឋអាមេរិកបន្ថែមថវិកាទៅ ១៨៥ប៊ីលានដុល្លារ ដើម្បីពង្រឹងប្រព័ន្ធការពារមីស៊ីល «Golden Dome»

ពិភពលោកកំពុងប្រឈមនឹងភាពតានតឹងកាន់តែខ្លាំងឡើង បណ្តាប្រទេសមហាអំណាចជាច្រើនកំពុងពង្រឹងវិស័យការពារជាតិរបស់ខ្លួន។ ក្នុងចំណោមប្រទេសទាំងនោះ សហរដ្ឋអាមេរិកបានប្រកាសបន្ថែមថវិកាសម្រាប់ប្រព័ន្ធការពារមីស៊ីល «Golden Dome» ដល់ ១៨៥ ប៊ីលានដុល្លារ។

នាយកកម្មវិធីមីស៊ីលសហរដ្ឋអាមេរិកបានបង្ហាញថា តម្លៃសម្រាប់ខែលការពារមីស៊ីល «Golden Dome» បានកើនឡើងដល់ ១៨៥ ប៊ីលានដុល្លារ បន្ទាប់ពីបន្ថែម ១០ ប៊ីលានដុល្លារទៀត។ ថវិកានេះគឺដើម្បីពន្លឿនសមត្ថភាពសំខាន់ៗលើមូលដ្ឋានលំហអាកាសរបស់ប្រទេសនេះ។

ទីភ្នាក់ងារព័ត៌មានរ៉យទ័របានរាយការណ៍ថា នាយកកម្មវិធី Golden Dome មានគម្រោងពង្រីកប្រព័ន្ធការពារមូលដ្ឋានផ្ទាល់ដី រួមមានមីស៊ីលស្ទាក់ចាប់ ឧបករណ៍ចាប់សញ្ញា និងប្រព័ន្ធបញ្ជានិងត្រួតពិនិត្យ។ ខណៈពេលដែលបន្ថែមធាតុផ្សំដែលមានមូលដ្ឋានលើលំហ ដែលមានន័យថា ការស្វែងរក តាមដាន និងទប់ទល់នឹងការគំរាមកំហែងដែលចូលមកពីគន្លងលំហអាកាស។

មេបញ្ជាការកងទ័ពអវកាស ឧត្តមសេនីយ៍ Michael Guetlein បានប្រាប់ក្នុងសន្និសីទកម្មវិធីការពារជាតិ McAleese នៅរដ្ឋ Virginia ថា៖ «ប្រធានកម្មវិធី Golden Dome ស្នើសុំឱ្យយើងបង្កើនល្បឿនសមត្ថភាពអវកាសមួយចំនួន»។

លោកក៏បានកំណត់អត្តសញ្ញាណកម្មវិធីចំនួនបីដែលនឹងទទួលបានអត្ថប្រយោជន៍ រួមមានគំនិតផ្តួចផ្តើមតាមដានមីស៊ីលកម្រិតខ្ពស់ បណ្តាញទិន្នន័យអវកាស និងឧបករណ៍ចាប់សញ្ញាអវកាសតាមដានល្បឿនលឿនជាងសំឡេងនិងមីស៊ីលផ្លោងបាលីស្ទិក ឬហៅថា HBTSS។

គួរឱ្យដឹងថា ទឹកប្រាក់ចំនួន ១៨៥ ប៊ីលានគ្រាន់តែគ្របដណ្តប់លើគោលបំណងនៃស្ថាបត្យកម្មប្រព័ន្ធការពារនេះប៉ុណ្ណោះ ចំណែកប្រព័ន្ធសមត្ថភាពពេញលេញនឹងត្រូវរាយការណ៍ក្នុងរយៈពេលមួយទសវត្សរ៍ខាងមុខ។