🔥អគ្គិភ័យក្នុងត្រីមាសទី១ ឆ្នាំ២០២៦ ថយចុះ១៩លើក ប៉ុន្តែបណ្តាលឱ្យមនុស្សស្លាប់២នាក់

ភ្នំពេញ៖ នាយកដ្ឋាននគរបាលបង្ការ ពន្លត់អគ្គិភ័យ និងសង្គ្រោះ នៃអគ្គស្នងការដ្ឋាននគរបាលជាតិ បានចេញរបាយការណ៍ថ្មីនៅថ្ងៃទី១៨ ខែមីនា ឆ្នាំ២០២៦ ដែលបង្ហាញថា ក្នុងត្រីមាសទី១ ឆ្នាំ២០២៦ មានករណីអគ្គិភ័យកើតឡើងចំនួន ២៤៧លើក។

នេះថយចុះចំនួន ១៩លើក បើធៀបនឹងរយៈពេលដូចគ្នាក្នុងឆ្នាំ២០២៥។ ទោះជាយ៉ាងណាក៏ដោយ ករណីទាំងនេះបានបណ្តាលឱ្យមនុស្សស្លាប់ចំនួន ២នាក់ និងរងរបួស២៩នាក់។

របាយការណ៍បានបង្ហាញថា ចំនួនមនុស្សស្លាប់ថយចុះ១២នាក់ បើធៀបនឹងឆ្នាំមុន ប៉ុន្តែចំនួនអ្នករងរបួសកើនឡើង១៧នាក់។ ករណីអគ្គិភ័យទាំងនេះក៏បានបណ្តាលឱ្យខូចខាតទ្រព្យសម្បត្តិជាច្រើនទៀតផងដែរ។

សំរាប់មូលហេតុចម្បងនៃអគ្គិភ័យ របាយការណ៍បានបង្ហាញថា៖
– ឆ្លងចរន្តអគ្គិសនី៖ ៤២.១៣%
– ប្រើប្រាស់ភ្លើង៖ ៣៩.៥៨%
– ក្តាប់ពុំបាន៖ ១៨.២៩%

ចំណែកឯរាជធានី-ខេត្តដែលមានករណីអគ្គិភ័យច្រើនជាងគេ រួមមាន៖
– រាជធានីភ្នំពេញ៖ ៥៣លើក (កើន១១លើកធៀបនឹងឆ្នាំ២០២៥)
– ខេត្តកណ្តាល៖ ២៧លើក (ថយចុះ១១លើកធៀបនឹងឆ្នាំ២០២៥)

អាជ្ញាធរបានអំពាវនាវឱ្យប្រជាពលរដ្ឋប្រុងប្រយ័ត្នក្នុងការប្រើប្រាស់អគ្គិសនី និងភ្លើង ដើម្បីកាត់បន្ថយហានិភ័យនៃអគ្គិភ័យ។