អ៊ីរ៉ង់វាយប្រហាររោងចក្រប្រេងនៅប្រទេសជិតខាង ជាការសងសឹកបន្ទាប់ពីវាលឧស្ម័ន Pars របស់ខ្លួនត្រូវគេវាយប្រហារ

ភាពតានតឹងនៅតំបន់ឈូងសមុទ្រពែរ្សបានកើនឡើងដល់កម្រិតថ្មី បន្ទាប់ពីអ៊ីរ៉ង់បានធ្វើការវាយប្រហារតបតវិញទៅលើរោងចក្រប្រេង និងឧស្ម័ននៅប្រទេសជិតខាង ក្រោយពីវាលឧស្ម័ន Pars ដ៏ធំរបស់ខ្លួនត្រូវបានគេវាយប្រហារនៅថ្ងៃទី១៨ ខែមីនា។

វាលឧស្ម័ន Pars ដែលជាវាលឧស្ម័នធម្មជាតិធំបំផុតរបស់ពិភពលោក និងស្ថិតនៅក្រោមការគ្រប់គ្រងរបស់អ៊ីរ៉ង់ ត្រូវបានគេវាយប្រហារកាលពីថ្ងៃទី១៨ ខែមីនា ដែលបានធ្វើឱ្យតម្លៃប្រេងកើនឡើងយ៉ាងខ្លាំងនៅទីផ្សារពិភពលោក។ ការវាយប្រហារនេះត្រូវបានគេចាត់ទុកថាជាការកើនឡើងនៃភាពតានតឹងរវាងសហរដ្ឋអាមេរិក និងអ៊ីរ៉ង់។

ជាការឆ្លើយតប អ៊ីរ៉ង់បានប្រកាសថានឹងវាយប្រហារគោលដៅប្រេង និងឧស្ម័ននៅទូទាំងតំបន់ឈូងសមុទ្រ ហើយបានចាប់ផ្តើមដោយការវាយប្រហារកាតារ និងបាញ់មីស៊ីលទៅលើអារ៉ាប៊ីសាអូឌីត។

ប្រព័ន្ធផ្សព្វផ្សាយអ៊ីស្រាអែលបានរាយការណ៍ថា ការវាយប្រហារលើវាលឧស្ម័ន Pars ត្រូវបានធ្វើឡើងដោយអ៊ីស្រាអែល ដោយមានការយល់ព្រមពីសហរដ្ឋអាមេរិក ទោះបីជាប្រទេសទាំងពីរនេះមិនបានអះអាងពីការទទួលខុសត្រូវចំពោះហេតុការណ៍នេះក៏ដោយ។

ទីភ្នាក់ងារសារព័ត៌មានរបស់អ៊ីរ៉ង់បានរាយការណ៍ថា ធុងស្តុកឧស្ម័ន និងផ្នែកមួយនៃរោងចក្រចម្រាញ់ប្រេងត្រូវបានកំណត់ជាគោលដៅ។ កម្មករទាំងអស់ត្រូវបានជម្លៀសចេញដោយសុវត្ថិភាព ហើយក្រោយមកភ្លើងត្រូវបានគ្រប់គ្រង។

ប្រទេសកាតារ ដែលជាសម្ព័ន្ធមិត្តជិតស្និទ្ធរបស់សហរដ្ឋអាមេរិក បានស្តីបន្ទោសអ៊ីស្រាអែលចំពោះការវាយប្រហារនេះ ដោយហៅវាថាជាទង្វើ “គ្រោះថ្នាក់ និងមិនទទួលខុសត្រូវ” ដែលគំរាមកំហែងដល់សន្តិសុខថាមពលពិភពលោក។ អារ៉ាប់រួម (UAE) ក៏បានថ្កោលទោសការវាយប្រហារនេះផងដែរ។

មិនយូរប៉ុន្មាន អ៊ីរ៉ង់បានចុះបញ្ជីរោងចក្រប្រេង និងឧស្ម័នសំខាន់ៗមួយចំនួននៅក្នុងតំបន់ ដែលខ្លួនហៅថា “គោលដៅផ្ទាល់ និងស្របច្បាប់” រួមមាន៖ រោងចក្រចម្រាញ់ប្រេង Samref និងរោងចក្រគីមីឥន្ធនៈ Jubail របស់អារ៉ាប៊ីសាអូឌីត វាលឧស្ម័ន Al Hosn របស់អារ៉ាប់រួម រោងចក្រគីមីឥន្ធនៈ Mesaieed របស់កាតារ ក្រុមហ៊ុន Mesaieed Holding និងរោងចក្រចម្រាញ់ប្រេង Ras Laffan។

អ៊ីរ៉ង់បានព្រមានថា រោងចក្រទាំងនេះត្រូវការជម្លៀសចេញភ្លាមៗ មុនពេលត្រូវបានវាយប្រហារក្នុងរយៈពេលប៉ុន្មានម៉ោងខាងមុខ។ ការព្រមាននេះបានធ្វើឱ្យមានការភ័យខ្លាចយ៉ាងខ្លាំងនៅក្នុងតំបន់ និងបានធ្វើឱ្យតម្លៃប្រេងកើនឡើងទៀតនៅទីផ្សារពិភពលោក។

ដោយ៖ ធីរីណា