By ភ្នំពេញ៖ ក្រសួងទេសចរណ៍បានប្រកាសរៀបចំព្រឹត្តិការណ៍សិល្បៈអន្តរជាតិដ៏ធំមួយដែលនឹងប្រព្រឹត្តិទៅនៅតំបន់ផាប់ស្រ្តីត ខេត្តសៀមរាប ចាប់ពីថ្ងៃទី២១ ដល់ទី២២ ខែមីនា ឆ្នាំ២០២៦។
ព្រឹត្តិការណ៍ «មហោស្រពសិល្បៈតាមដងផ្លូវអន្តរជាតិ កម្ពុជា-ចិន» នេះ នឹងចាប់ផ្ដើមនៅម៉ោង៦យប់ ដោយមានការសម្តែងសិល្បៈរួមគ្នារបស់សិល្បករកម្ពុជា និងចិន ព្រមទាំងការដង្ហែរក្បួនសិល្បៈដ៏អស្ចារ្យ។
ក្រសួងទេសចរណ៍បានសហការជាមួយរដ្ឋបាលខេត្តសៀមរាប ស្ថានទូតចិនប្រចាំកម្ពុជា និងភាគីពាក់ព័ន្ធផ្សេងៗទៀត ដើម្បីរៀបចំព្រឹត្តិការណ៍នេះឱ្យបានពេញលេញ។ គោលដៅចម្បងគឺដើម្បីបន្តយុទ្ធនាការ «ឆ្នាំទេសចរណ៍កម្ពុជា-ចិន» និងផ្សព្វផ្សាយអំពីការលើកលែងទិដ្ឋាការសម្រាប់ពលរដ្ឋចិន។
ការលើកលែងទិដ្ឋាការនេះអនុញ្ញាតឱ្យពលរដ្ឋចិនស្នាក់នៅបាន១៤ថ្ងៃ ក្នុងអំឡុងពេល៤ខែ (១៥ មិថុនា ដល់ ១៥ តុលា ២០២៦) ដើម្បីទាក់ទាញភ្ញៀវទេសចរចិនមកទស្សនាកម្ពុជាកាន់តែច្រើន។
ក្រសួងទេសចរណ៍អំពាវនាវដល់សាធារណជនទូទៅ ស្ថាប័នពាក់ព័ន្ធ និងសារព័ត៌មានជាតិ-អន្តរជាតិ ចូលរួមដោយឥតគិតថ្លៃ និងជំរុញផ្សព្វផ្សាយព្រឹត្តិការណ៍នេះឱ្យបានទូលំទូលាយ។
