By ខេត្តកណ្តាល – កងរាជអាវុធហត្ថស្រុកស្អាងបានបង្ក្រាបបណ្តាញជួញដូរគ្រឿងញៀនធំមួយ ដោយឃាត់ខ្លួនជនសង្ស័យ១៦នាក់ និងរកឃើញម៉ាទឹកកក១៧កញ្ចប់នៅក្នុងផ្ទះសំណាក់មួយកន្លែងនៅស្រុកស្អាង។
ព្រឹត្តិការណ៍នេះកើតឡើងកាលពីថ្ងៃទី១៦ និង១៧ ខែមីនា ឆ្នាំ២០២៦ នៅផ្ទះសំណាក់យីហោ (ហ្គោលអន) ភូមិព្រែកតាឡៃ ឃុំព្រែកអំបិល។ លោកវរសេនីយ៍ត្រី អ៊ូ ផល្លី មេបញ្ជាការមូលដ្ឋានកងរាជអាវុធហត្ថស្រុកស្អាងបានបញ្ជាក់ថា ក្រុមជនសង្ស័យទាំង១៦នាក់មានបុរស១១នាក់ និងស្រី៥នាក់ ដែល១៥នាក់វិជ្ជមានសារធាតុញៀន។
ក្រុមជនសង្ស័យមានអាយុពី១៨ដល់៤៤ឆ្នាំ ក្នុងនោះមានមេការផ្ទះសំណាក់១នាក់។ ភាគច្រើនមានទីលំនៅនៅស្រុកស្អាង (១២នាក់) ស្រុកកោះធំ (៣នាក់) និងស្រុកព្រៃកប្បាស ខេត្តតាកែវ (១នាក់)។
វត្ថុតាងដែលចាប់យកបានរួមមាន៖ ម្សៅក្រាមពណ៌សសង្ស័យជាសារធាតុញៀន១៧កញ្ចប់ បារីអេឡិចត្រូនិក៤ដើម រថយន្តសាំយ៉ុង១គ្រឿង ទូរស័ព្ទដៃ៧គ្រឿង និងម៉ូតូ៤គ្រឿង។
ប្រតិបត្តិការនេះត្រូវបានធ្វើឡើងក្រោមការដឹកនាំរបស់លោកឧត្តមសេនីយ៍ត្រី សំ តុលា មេបញ្ជាការកងរាជអាវុធហត្ថខេត្ត ដោយមានការសម្របសម្រួលពីព្រះរាជអាជ្ញាអមសាលាដំបូងខេត្តកណ្តាល។
ការចាប់ខ្លួនភាគច្រើនកើតឡើងនៅក្នុងបន្ទប់លេខ៦៦, ០៨, ០៣ និង០៤ នៃផ្ទះសំណាក់។ ក្រោយមកកម្លាំងបានបន្តចាប់ខ្លួនជនសង្ស័យម្នាក់ទៀតឈ្មោះ សម្បត្តិ សុខហេង នៅស្រុកកោះធំ។
ជនសង្ស័យបានសារភាពថា ថ្នាំញៀនត្រូវបានទិញក្នុងតម្លៃពី៧៥០,០០០រៀលដល់៣លានរៀលពីឈ្មោះឆេង ចាន់ណា ដែលទិញពីឈ្មោះថាញ់នៅរាជធានីភ្នំពេញ។
បច្ចុប្បន្ន ជនសង្ស័យទាំង១៦នាក់រួមជាមួយវត្ថុតាងត្រូវបានបញ្ជូនទៅកងរាជអាវុធហត្ថខេត្តកណ្តាលដើម្បីបន្តនីតិវិធីតាមច្បាប់។
ដោយ៖ សូរិយា
