អង្គភាពប្រឆាំងពុករលួយឃាត់ខ្លួនមន្ត្រីផ្ទាល់ ៣នាក់ ពាក់ព័ន្ធបទពុករលួយធ្ងន់ធ្ងរ

ភ្នំពេញ៖ អង្គភាពប្រឆាំងអំពើពុករលួយ (ACU) បានធ្វើការឃាត់ខ្លួនមន្ត្រីផ្ទាល់របស់ខ្លួនចំនួន ៣នាក់ ដែលជាប់សង្ស័យពាក់ព័ន្ធនឹងបទពុករលួយយ៉ាងធ្ងន់ធ្ងរ។

លោក សយ ច័ន្ទវិចិត្រ អ្នកនាំពាក្យអង្គភាពប្រឆាំងអំពើពុករលួយ បានបញ្ជាក់ថា កាលពីថ្ងៃទី១៦ ខែមីនា ឆ្នាំ២០២៦ អង្គភាពបានបញ្ជូនសំណុំរឿងដែលមានជនសង្ស័យ ៣រូបទៅសាលាដំបូងរាជធានីភ្នំពេញ។

ជនសង្ស័យទាំង ៣នាក់មាន៖

១. លោក ជឹម អូន អាយុ ៣៨ឆ្នាំ ជាមន្ត្រីនាយកដ្ឋានស៊ើបអង្គេត និងចារកម្មនៃ ACU ជាប់សង្ស័យពីបទរំលោភអំណាច មានទ្រព្យសម្បត្តិដោយខុសច្បាប់ និងមិនប្រកាសទ្រព្យសម្បត្តិ និងបំណុល។

២. លោក ជឹម សុខជឿន អាយុ ៣២ឆ្នាំ ជាជំនួយការរបស់លោក ជឹម អូន ជាប់សង្ស័យពីបទសមគំនិតក្នុងអំពើរំលោភអំណាច។

៣. លោកស្រី ភេន រចនា អាយុ ៣៦ឆ្នាំ អតីតមន្ត្រីជាប់កិច្ចសន្យានៃនាយកដ្ឋានរដ្ឋបាលនិងហិរញ្ញវត្ថុនៃ ACU ជាប់សង្ស័យពីបទសមគំនិតក្នុងអំពើរំលោភអំណាច។

ការឃាត់ខ្លួននេះបង្ហាញពីការតស៊ូរបស់អង្គភាពប្រឆាំងពុករលួយក្នុងការប្រឆាំងនឹងអំពើពុករលួយ សូម្បីតែក្នុងជួររបស់ខ្លួនផ្ទាល់ក៏ដោយ។ សំណុំរឿងនេះត្រូវបានបញ្ជូនទៅតុលាការដើម្បីចាត់វិធានការតាមផ្លូវច្បាប់។

ដោយ៖ សិលា