សមត្ថកិច្ចប្រតិបត្តិការបង្ក្រាបទីតាំងប្រព្រឹត្តបទល្មើសអនឡាញនៅស្រុកសំរោងទង ឃាត់ខ្លួនជនសង្ស័យ៧នាក់

ខេត្តកំពង់ស្ពឺ – នៅថ្ងៃទី១៨ ខែមីនា ឆ្នាំ២០២៦ វេលាម៉ោង១៤:៣០នាទី លោកឧត្តមសេនីយ៍ទោ ឃឹម សុកខៃ ស្នងការនគរបាលខេត្តកំពង់ស្ពឺ និងលោកព្រះរាជអាជ្ញារង ពៅ សម្បូរណ៍ តំណាងអយ្យការអមសាលាដំបូងខេត្តកំពង់ស្ពឺ បានដឹកនាំកម្លាំងព្រហ្មទណ្ឌកំរិតធ្ងន់ខេត្តកំពង់ស្ពឺ សហការជាមួយកម្លាំងអធិការដ្ឋានស្រុកសំរោងទង បើកប្រតិបត្តិការបង្រ្កាបទីតាំងប្រព្រឹត្តបទល្មើស SCAM ONLINE នៅភូមិតាំងក្រសាំង ឃុំព្នាយ ស្រុកសំរោងទង។

ក្នុងប្រតិបត្តិការនេះ សមត្ថកិច្ចបានឃាត់ខ្លួនជនសង្ស័យចំនួន០៧នាក់ ក្នុងនោះមានជនជាតិឥណ្ឌូនេស៊ី៦នាក់ និងជនជាតិខ្មែរ១នាក់។ ជនសង្ស័យទាំង៧នាក់មាន៖

1. ឈ្មោះ LIM DESY ភេទស្រី អាយុ៤៤ឆ្នាំ
2. ឈ្មោះ YESI DESWITA ភេទស្រី អាយុ២៥ឆ្នាំ
3. ឈ្មោះ DELA SRISKA ភេទស្រី អាយុ៣២ឆ្នាំ
4. ឈ្មោះ WIDYA WATI ភេទស្រី អាយុ២៣ឆ្នាំ
5. ឈ្មោះ NANDO ALDY SAFERA ភេទប្រុស អាយុ២៩ឆ្នាំ
6. ឈ្មោះ IIRVAN EFENDI ភេទប្រុស អាយុ២៧ឆ្នាំ
7. ឈ្មោះ ហេង សុខពៅ ភេទប្រុស អាយុ២៦ឆ្នាំ (បើកបររថយន្តឱ្យថៅកែ និងយាមទីតាំង)

សមត្ថកិច្ចបានដកហូតវត្ថុតាងជាច្រើនរួមមាន៖

• ទូរស័ព្ទដៃ៥៩គ្រឿង
• ឧបករណ៍ថតសំឡេង៨គ្រឿង
• កុំព្យូទ័រឡេបថប៧គ្រឿង
• ឯកសណ្ឋាននគរបាលឥណ្ឌូនេស៊ី៤អាវ សក្តិ និងឡូហ្គោមួយចំនួន
• ម្សៅក្រាមសថ្លា សង្ស័យជាគ្រឿងញៀន៥៩កញ្ចប់ និងធំ១កញ្ចប់

ជនសង្ស័យទាំងអស់បានសារភាពថា ពួកគាត់ពិតជាបានបើកទីតាំងប្រព្រឹត្តបទល្មើស SCAM ONLINE ពិតមែន។ ប្រតិបត្តិការនេះបង្ហាញពីការតស៊ូមតិរបស់សមត្ថកិច្ចក្នុងការបង្រ្កាបបទល្មើសអនឡាញនៅក្នុងប្រទេស។

ដោយ៖ សូរិយា