By មេដឹកនាំកំពូលអ៊ីរ៉ង់ លោក Mojtaba Khamenei បានសន្យាថា នឹងសងសឹកចំពោះការសម្លាប់ប្រធានសន្តិសុខកំពូលលោក Ali Larijani ដែលត្រូវបានគេចាត់ទុកថាជាការធ្វើឃាតដោយសហរដ្ឋអាមេរិក និងអ៊ីស្រាអែល។
កាលពីថ្ងៃទី១៨ ខែមីនា លោក Mojtaba បានសរសេរនៅលើបណ្ដាញសង្គម X ក្នុងឱកាសពិធីបុណ្យសពរបស់លោក Larijani នៅទីក្រុងតេហេរ៉ង់។ លោកបានលើកឡើងថា៖ «មិនមានការសង្ស័យទេថា ការធ្វើឃាតបែបនេះបានបង្ហាញពីភាពសំខាន់របស់លោក [Ali Larijani] និងការស្អប់ខ្ពើមពីសត្រូវនៃសាសនាអ៊ីស្លាមចំពោះលោក»។
លោក Mojtaba បានពិពណ៌នាអំពីលោក Larijani ថាជាមនុស្ស«ពោរពេញដោយចំណេះដឹង ចក្ខុវិស័យ និងប្រាជ្ញា» ដែលបានបម្រើការងារជិត ៥ទសវត្សរ៍ក្នុងវិស័យនយោបាយ យោធា សន្តិសុខ វប្បធម៌ និងរដ្ឋបាល។
ទោះបីជាលោក Mojtaba មិនបានបង្ហាញខ្លួនជាសាធារណៈច្រើនក៏ដោយ ក៏លោកបានប្រកាសយ៉ាងច្បាស់ថា៖ «រាល់ដំណក់ឈាមនីមួយៗដែលហូរចេញមានតម្លៃផ្ទាល់ខ្លួន ហើយអ្នកដែលបានសម្លាប់បុគ្គលដ៏បរិសុទ្ធ ពួកគេនឹងត្រូវសងមកវិញឆាប់ៗនេះ»។
លេខាធិការដ្ឋានអ៊ីរ៉ង់បានប្រកាសជាផ្លូវការអំពីការស្លាប់របស់លោក Larijani ដោយលើកតម្កើងគាត់ថាជា«អ្នកបម្រើដ៏ស្មោះត្រង់របស់ព្រះ» ដែលបានលះបង់ពេញមួយជីវិតដើម្បីបដិវត្តន៍ឥស្លាម។
រដ្ឋមន្ត្រីការបរទេសអ៊ីរ៉ង់បានអះអាងថា ទោះបីលោក Ali Larijani ត្រូវសម្លាប់ក៏ដោយ ប្រព័ន្ធអ៊ីរ៉ង់នៅតែ«រឹងមាំ» និងបន្តដំណើរការដដែល។
