ថៃស្នើផ្តល់ស្បៀងអាហារទៅអ៊ីរ៉ង់ ដើម្បីអនុញ្ញាតឱ្យកប៉ាល់របស់ខ្លួនឆ្លងកាត់ច្រកហ័រមូហ្សដោយសុវត្ថិភាព

រដ្ឋមន្ត្រីក្រសួងពាណិជ្ជកម្មថៃ លោកស្រី Suphajee Suthumpun បានបង្ហាញថា ប្រទេសថៃកំពុងពិចារណាការនាំចេញស្បៀងអាហារ និងវត្ថុធាតុដើមទៅកាន់អ៊ីរ៉ង់ ដើម្បីទទួលបានការអនុញ្ញាតឱ្យកប៉ាល់របស់ខ្លួនអាចឆ្លងកាត់ច្រកសមុទ្រហ័រមូហ្សប្រកបដោយសុវត្ថិភាព។

លោកស្រី Suphajee បានពន្យល់កាលពីថ្ងៃអង្គារ (១៧ មីនា) ថា៖ «ក្រសួងការបរទេសត្រូវបានស្នើសុំឱ្យបញ្ចុះបញ្ចូលអ៊ីរ៉ង់ឱ្យអនុញ្ញាតឱ្យកប៉ាល់ថៃដឹកជញ្ជូនទំនិញនេះចេញតាមរយៈច្រកសមុទ្រហ័រមូហ្ស។ វាមិនមែនជាទំនិញគ្រោះថ្នាក់ទេ ប៉ុន្តែវាជាទំនិញចាំបាច់សម្រាប់ឧស្សាហកម្មវេចខ្ចប់របស់យើង»។

យោងតាមការបញ្ជាក់ ស្តុកគ្រាប់ប្លាស្ទិកបច្ចុប្បន្ននៅថៃនឹងអស់ការផ្គត់ផ្គង់ត្រឹមចុងខែមេសា ដោយប្រភពសំខាន់នៃគ្រាប់ប្លាស្ទិកគឺមកពីតំបន់មជ្ឈិមបូព៌ា។ ការនាំចេញអាចរួមមានអាហារកែច្នៃ និងវត្ថុធាតុដើមផ្សេងៗ ដែលថៃបានចុះកិច្ចសន្យាលក់ទៅតំបន់មជ្ឈិមបូព៌ា។

ក្រសួងពាណិជ្ជកម្ម និងក្រសួងការបរទេសថៃកំពុងចរចាកិច្ចព្រមព្រៀងដើម្បីអនុញ្ញាតឱ្យកប៉ាល់ថៃអាចដឹកទំនិញទៅមជ្ឈិមបូព៌ា និងនាំយកគ្រាប់ប្លាស្ទិក និងជីកសិកម្មមកកាន់ប្រទេសវិញ។ លោកស្រី Suphajee បានអះអាងថា កិច្ចព្រមព្រៀងបែបនេះគួរតែចរចាទាំងជាមួយអ៊ីរ៉ង់ និងប្រទេសដទៃផ្សេងទៀតនៅតំបន់មជ្ឈិមបូព៌ា។