សម្តេចតេជោ ហ៊ុន សែន ទទួលសារតាំងពីឯកអគ្គរដ្ឋទូតស្លូវ៉ាគីថ្មី សង្ឃឹមពង្រឹងទំនាក់ទំនងពាណិជ្ជកម្ម-សេដ្ឋកិច្ច

ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា បានទទួលសារតាំងពីលោក អេឡិចសិនដឺ មីខូវស៊ិន (Alexander Micovčin) ឯកអគ្គរដ្ឋទូតថ្មីនៃសាធារណរដ្ឋស្លូវ៉ាគីប្រចាំនៅកម្ពុជា នៅវិមានសាមគ្គីភាព ព្រឹទ្ធសភា កាលពីព្រឹកថ្ងៃទី១៩ ខែមីនា ឆ្នាំ២០២៦។

លោក ជា ធីរិទ្ធ អ្នកនាំពាក្យព្រឹទ្ធសភា បានឱ្យដឹងថា សម្តេចតេជោបានស្វាគមន៍ចំពោះឯកឧត្តមឯកអគ្គរដ្ឋទូតថ្មី និងបង្ហាញក្តីសង្ឃឹមថា អាណត្តិរបស់លោកនឹងពង្រឹងទំនាក់ទំនងកម្ពុជា-ស្លូវ៉ាគីឱ្យកាន់តែរីកចម្រើន។ សម្តេចតេជោបានសង្កត់ធ្ងន់លើឱកាសខួប៧០ឆ្នាំនៃទំនាក់ទំនងការទូតរវាងប្រទេសទាំងពីរ ដែលនឹងមានក្នុងឆ្នាំក្រោយ។

លោកឯកអគ្គរដ្ឋទូតស្លូវ៉ាគីបានសម្ដែងការអរគុណចំពោះសម្តេចតេជោ និងបញ្ជាក់ថា បេសកកម្មរបស់លោកគឺលើកកម្ពស់ទំនាក់ទំនងពាណិជ្ជកម្ម សេដ្ឋកិច្ច និងការវិនិយោគរវាងប្រទេសទាំងពីរ។ លោកបានសង្កត់ធ្ងន់ថា ទំនាក់ទំនងសេដ្ឋកិច្ចជាចំណុចស្នូលក្នុងអាណត្តិរបស់លោក។

សម្តេចតេជោបានសម្ដែងការគាំទ្រចំពោះការពង្រីកទំនាក់ទំនងសេដ្ឋកិច្ច ពាណិជ្ជកម្ម និងការវិនិយោគ ដោយចាត់ទុកជាចំណុចស្នូលនៃទំនាក់ទំនងក្រៅពីការទូត។ សម្តេចតេជោក៏បានកោតសរសើរក្រសួងការបរទេសនៃប្រទេសទាំងពីរដែលតែងគាំទ្រគ្នាក្នុងឆាកអន្តរជាតិ។

នៅទីបញ្ចប់ សម្តេចតេជោ ហ៊ុន សែន បានជូនពរឱ្យលោក Alexander Micovčin បំពេញបេសកកម្មនៅកម្ពុជាប្រកបដោយភាពជោគជ័យ។

ដោយ៖ សិលា