រដ្ឋសភាអាមេរិករញ្ជួយដោយសំណើថវិកា២០០ពាន់លានដុល្លារ សម្រាប់សង្រ្គាមអ៊ីរ៉ង់

រដ្ឋសភាអាមេរិកកំពុងជួបប្រទះនឹងការរិះគន់យ៉ាងខ្លាំងក្លាបន្ទាប់ពីរដ្ឋបាលត្រាំស្នើថវិកាចំណាយដ៏ធំធេងចំនួន២០០ពាន់លានដុល្លារ សម្រាប់ប្រើប្រាស់ក្នុងសង្រ្គាមនៅប្រទេសអ៊ីរ៉ង់។ សំណើនេះបានធ្វើឱ្យសមាជិកសភាទាំងពីរគណបក្សចេញមុខរិះគន់យ៉ាងខ្លាំង។

កាលពីថ្ងៃព្រហស្បតិ៍ទី១៩មីនា ប្រធានាធិបតីដូណាល់ត្រាំបានបញ្ជាក់ជាផ្លូវការនូវសំណើថវិកានេះ ដោយលោកបានសង្កត់ធ្ងន់ថា ទឹកប្រាក់នេះនឹងត្រូវយកទៅប្រើប្រាស់សម្រាប់តម្រូវការចាំបាច់នានា។ លោក Pete Hegseth រដ្ឋមន្ត្រីក្រសួងការពារជាតិ ក៏បានចេញមុខការពារតួលេខដ៏ខ្ពស់នេះដែរ។

ខាងបក្សប្រជាធិបតេយ្យបានវាយប្រហារចំៗទៅលើសំណើនេះ ដោយសមាជិកព្រឹទ្ធសភា លោក Chris Murphy បានព្រមានថា ក្នុងខណៈដែលតំបន់មជ្ឈិមបូព៌ាកំពុងឆេះដូចភ្លើង តម្លៃទំនិញ និងការរស់នៅក្នុងស្រុកក៏កំពុងតែហក់ឡើងខ្ពស់គួរឱ្យបារម្ភដែរ។

សូម្បីតែនៅក្នុងជួរខាងបក្សសាធារណរដ្ឋខ្លួនឯង ក៏មិនទាន់មានសាមគ្គីភាពពេញលេញក្នុងការគាំទ្រគម្រោងនេះដែរ។ ស្ថានភាពនេះកាន់តែតានតឹងខ្លាំង ដោយសារតែវាចំពេលដែលអាមេរិកកំពុងឈានចូលដល់ឆ្នាំបោះឆ្នោតពាក់កណ្ដាលអាណត្តិ។

បច្ចុប្បន្ន ការចរចាលើរឿងនេះមិនទាន់បានចាប់ផ្តើមនៅឡើយទេ ប៉ុន្តែពិភពលោកកំពុងតាមដានមើលថា តើកញ្ចប់ថវិកា២០០ពាន់លានដុល្លារនេះ នឹងត្រូវបានអនុម័ត ឬត្រូវបក្សប្រឆាំងកាត់បន្ថយចំនួនវិញ។