By សង្រ្គាមនៅអ៊ីរ៉ង់ដែលផ្ទុះឡើងចាប់ពីថ្ងៃទី២៨ ខែកុម្ភៈ បាននាំឱ្យភាគីទាំងសហរដ្ឋអាមេរិក អ៊ីស្រាអែល និងអ៊ីរ៉ង់ខូចខាតយ៉ាងធ្ងន់ធ្ងរ។ ទោះបីជាគ្មានភាគីណាទទួលជ័យជម្នះពិតប្រាកដក៏ដោយ ក៏សង្រ្គាមនេះបន្តធ្វើឱ្យប្រទេសក្នុងតំបន់មជ្ឈិមបូព៌ារងផលប៉ះពាល់យ៉ាងខ្លាំង។
មន្ត្រីអាមេរិកពីររូបបានបញ្ជាក់ជាផ្លូវការនៅថ្ងៃទី១៨ ខែមីនា ថាយន្តហោះគ្មានមនុស្សបើក (ដ្រូន) ម៉ាក MQ-9 Reaper ជាង១០គ្រឿងត្រូវបានបំផ្លាញក្នុងសង្រ្គាមអ៊ីរ៉ង់។ ដ្រូនទាំងនេះមានសមត្ថភាពទាំងកំណត់គោលដៅសត្រូវ និងឈ្លបការណ៍យោធា។
ដ្រូន Reaper ត្រូវបានបំផ្លាញដោយមីស៊ីលអ៊ីរ៉ង់ ឬការវាយប្រហារដោយផ្ទាល់របស់កងទ័ពអ៊ីរ៉ង់។ ដ្រូនម៉ាកនេះអាចត្រូវបានប្រើជាយន្តហោះឈ្លបយកការណ៍ ហើយមានសមត្ថភាពបំពាក់ដោយមីស៊ីល Hellfire សម្រាប់វាយប្រហារគោលដៅ។
ការបាត់បង់ដ្រូន Reapers ទាំងនេះបង្ហាញពីចំនួនដ្រូនសំខាន់ៗដែលត្រូវបានដំណើរការក្នុងប្រតិបត្តិការរបស់សហរដ្ឋអាមេរិកប្រឆាំងនឹងអ៊ីរ៉ង់។ ការខាតបង់នេះត្រូវបានរាយការណ៍ជាលើកដំបូងដោយកាសែត Wall Street Journal។
គួរបញ្ជាក់ថា កងទ័ពអាកាសអាមេរិកបានប្រកាសពីកិច្ចសន្យាទិញដ្រូនក្នុងរយៈពេល៥ឆ្នាំចុងក្រោយ រួមមានដ្រូនម៉ាក Reapers ក្នុងឆ្នាំ២០២០។ ក្រុមហ៊ុនផលិតដ្រូន General Atomics បានបិទខ្សែសង្វាក់ផលិតកម្មកាលពីឆ្នាំមុន បន្ទាប់ពីផលិតដ្រូនម៉ាកនេះបាន៥៧៥គ្រឿង។
យោងតាមអ្នកនាំពាក្យរបស់ក្រុមហ៊ុន General Atomics លោក C. Mark Brinkley ដ្រូនចេញចុងក្រោយនេះមានតម្លៃជាង១៦លានដុល្លារក្នុងមួយគ្រឿង។ ការខាតបង់នេះបង្ហាញពីការប្រឈមមុខរបស់កងទ័ពអាមេរិកនៅតំបន់មជ្ឈិមបូព៌ា។
