By រាជធានីហាណូី – តម្លៃប្រេងឥន្ធនៈនៅវៀតណាមបានកើនឡើងខ្លាំងក្លានៅថ្ងៃសុក្រទី២០ មីនា ២០២៦ បន្ទាប់ពីរដ្ឋាភិបាលប្រកាសដំឡើងតម្លៃយប់ថ្ងៃព្រហស្បតិ៍ ដោយសារការភ័យព្រួយពីការខ្វះខាតប្រេងនិងឧស្ម័នដោយសារសង្រ្គាមមជ្ឈិមបូព៌ា។
ការដំឡើងតម្លៃនេះធ្វើឱ្យតម្លៃប្រេងសាំងធម្មតាកើនឡើង២០% ដល់៣០,៦៩០ដុង (ប្រហែល១.២០ដុល្លារ/លីត្រ) ខណៈប្រេងម៉ាស៊ូតកើនឡើងជិត៣៤% ដល់៣៣,៤២០ដុង។ នេះជាការកើនឡើងជាង៥០% សម្រាប់សាំង និងជាង៧០% សម្រាប់ម៉ាស៊ូត ចាប់តាំងពីជម្លោះផ្ទុះឡើងចុងខែកុម្ភៈ។
បណ្ដាប្រទេសអាស៊ីអាគ្នេយ៍កំពុងទទួលរងផលប៉ះពាល់ធ្ងន់ធ្ងរពីការហក់ឡើងខ្ពស់នៃតម្លៃប្រេងម៉ាស៊ូត ក្រោយការវាយប្រហារប្រឆាំងហេដ្ឋារចនាសម្ព័ន្ធថាមពលនៅអ៉ីរ៉ង់ និងរដ្ឋឈូងសមុទ្រអារ៉ាប់។
ក្រសួងពាណិជ្ជកម្មវៀតណាមបានបញ្ជាក់ថា ការដំឡើងថ្លៃនេះបណ្ដាលមកពីសង្រ្គាមមជ្ឈិមបូព៌ា ការគ្រប់គ្រងរបស់អ៉ីរ៉ង់លើច្រកសមុទ្រ Hormuz និងសង្រ្គាមរុស្ស៉ី-អ៊ុយក្រែន។ ទោះជាយ៉ាងណា អាជ្ញាធរវៀតណាមបានធានាថា ប្រទេសនេះអាចធានាការប្រើប្រាស់ប្រេងនិងឧស្ម័នគ្រប់គ្រាន់រហូតដល់ចុងខែមេសា។
នៅប្រទេសជិតខាង មីយ៉ាន់ម៉ាក៏បានជួបប្រទះនឹងការកើនឡើងតម្លៃប្រេងសាំងប្រហែល៣០% ដែរ ខណៈថៃក៏បានឃើញតម្លៃប្រេងឥន្ធនៈកើនឡើងក្នុងសប្ដាហ៍នេះ ដោយរដ្ឋាភិបាលបានប្រកាសតម្លៃប្រេងម៉ាស៊ូតខ្ពស់ជាងមុន។
ស្ថានភាពនេះបង្ហាញពីផលប៉ះពាល់ឆ្លងដែននៃវិបត្តិថាមពលលើតំបន់អាស៊ីអាគ្នេយ៍ ដែលអាចបន្តប៉ះពាល់ដល់សេដ្ឋកិច្ចនិងការរស់នៅរបស់ប្រជាជនក្នុងតំបន់។
