ឧបនាយករដ្ឋមន្ត្រីក្រសួងយុត្តិធម៌ ជួបអ្នកសម្របសម្រួលអង្គការសហប្រជាជាតិថ្មី ពិភាក្សាកិច្ចសហប្រតិបត្តិការ

ភ្នំពេញ៖ លោក កើត រិទ្ធ ឧបនាយករដ្ឋមន្�ត្រី រដ្ឋមន្ត្រីក្រសួងយុត្តិធម៌ បានទទួលជួបលោកស្រី Vladanka Andreeva អ្នកសម្របសម្រួលអង្គការសហប្រជាជាតិ (UN) ប្រចាំកម្ពុជា និងសហការី នៅទីស្តីការក្រសួងយុត្តិធម៌ កាលពីរសៀលថ្ងៃទី១៨ ខែមីនា ឆ្នាំ២០២៦។

ក្នុងជំនួបនេះ លោកឧបនាយករដ្ឋមន្ត្រីបានស្វាគមន៍យ៉ាងកក់ក្តៅចំពោះលោកស្រី Vladanka Andreeva និងបានថ្លែងអំណរគុណដល់អង្គការសហប្រជាជាតិ ដែលតែងផ្តល់ការគាំទ្រ និងកិច្ចសហប្រតិបត្តិការដល់រាជរដ្ឋាភិបាលកម្ពុជា។

លោកស្រី Vladanka Andreeva បានឆ្លើយតបដោយថ្លែងអំណរគុណចំពោះការទទួលជួប និងបង្ហាញអារម្មណ៍សោមនស្សរីករាយក្នុងការត្រឡប់មកបំពេញការងារនៅកម្ពុជាវិញ ក្នុងតួនាទីថ្មីជាអ្នកសម្របសម្រួលអង្គការសហប្រជាជាតិ។

ភាគីទាំងពីរបានពិភាក្សាយ៉ាងសកម្មអំពីកិច្ចសហប្រតិបត្តិការរវាងក្រសួងយុត្តិធម៌ និងភ្នាក់ងារអង្គការសហប្រជាជាតិផ្សេងៗ រួមមាន OHCHR, UNICEF, UNDP និង UNODC។ កិច្ចការសំខាន់ៗដែលបានពិភាក្សារួមមាន៖ យុត្តិធម៌អនិតិជន ភាពចង្អៀតណែនក្នុងពន្ធនាគារ ការប្រយុទ្ធប្រឆាំងគ្រឿងញៀន និងការប្រយុទ្ធប្រឆាំងនឹងការឆបោកតាមប្រព័ន្ធបច្ចេកវិទ្យា។

លោកឧបនាយករដ្ឋមន្ត្រីបានលើកឡើងអំពីបញ្ហាប្រឈមផ្សេងៗ និងសង្កត់ធ្ងន់លើសារៈសំខាន់នៃការចូលរួមគាំទ្រពីដៃគូសហការ។ លោកស្រី Vladanka Andreeva បានឆ្លើយតបដោយធានាផ្តល់កិច្ចសហប្រតិបត្តិការយ៉ាងទូលំទូលាយដល់ក្រសួងយុត្តិធម៌។

ក្នុងផ្នែកចុងក្រោយ ភាគីទាំងពីរបានពិភាក្សាលើបញ្ហាព្រំដែនកម្ពុជា-ថៃ ដែលប៉ះពាល់ដល់ជីវភាពប្រជាជន។ លោកស្រី Vladanka Andreeva បានបញ្ជាក់ថា នាងនឹងពិនិត្យលទ្ធភាពក្នុងការផ្តល់ការគាំទ្រដល់ជនភៀសសឹកតាមរយៈភ្នាក់ងារអង្គការសហប្រជាជាតិពាក់ព័ន្ធ។

ដោយ៖ សិលា