ជនជាតិចិនវាយសម្លាប់ជនជាតិចិនដូចគ្នា រុំកម្រាលពូកបោះចោលកណ្តាលផ្លូវ

ភ្នំពេញ៖ សមត្ថកិច្ចបានឃាត់ខ្លួនជនជាតិចិនម្នាក់ ដែលជាប់ពាក់ព័ន្ធនឹងករណីវាយសម្លាប់ជនជាតិចិនម្នាក់ទៀត រួចចងរុំកម្រាលពូកដឹកទៅបោះចោលនៅលើដងផ្លូវក្នុងតំបន់សែនសុខ។

ឃាតករដែលត្រូវឃាត់ខ្លួនមានឈ្មោះ KE ZETAO អាយុ ២៥ឆ្នាំ ជនជាតិចិន ស្នាក់នៅផ្ទះជួលលេខ៣២ បុរីភ្នំពេញថ្មី។ ជនរងគ្រោះមិនទាន់ស្គាល់អត្តសញ្ញាណនៅឡើយទេ។

នគរបាលខណ្ឌសែនសុខបានឱ្យដឹងថា ជនសង្ស័យត្រូវបានឃាត់ខ្លួននៅថ្ងៃទី១៨ មីនា ២០២៦ ក្នុងបុរីភ្នំពេញថ្មី ដោយជាប់ពាក់ព័ន្ធនឹងអំពើឃាតកម្មដែលកើតឡើងនៅថ្ងៃទី១៧ មីនា វេលាម៉ោង០១:៣០នាទីយប់។

តាមការស្រាវជ្រាវ បន្ទាប់ពីមានករណីឃាតកម្ម នគរបាលខណ្ឌសែនសុខដឹកនាំដោយលោកវរៈសេនីយ៍ឯក ហ៊ួរ ម៉េងវ៉ាង បានសហការជាមួយនគរបាលព្រហ្មទណ្ឌកំរិតធ្ងន់ ធ្វើការស្រាវជ្រាវតាមកាមេរ៉ាសុវត្ថិភាព ហើយឈានទៅឃាត់ខ្លួនជនសង្ស័យ។ នៅសល់បក្ខពួក២នាក់ទៀតកំពុងត្រូវស្រាវជ្រាវឃាត់ខ្លួន។

បន្ទាប់ពីឃាត់ខ្លួន សមត្ថកិច្ចបានចុះឆែកឆេរផ្ទះជួលលេខ១៣២ រកឃើញនិងដកហូតបានលិខិតឆ្លងដែន៧ក្បាល។ នៅផ្ទះជួលមួយទៀត រកឃើញស្លាកលេខរថយន្ត២គ្រឿង ម៉ូនីទ័រកុំព្យូទ័រ៤គ្រឿង និងខ្សែសាកមួយ។

គួរបញ្ជាក់ថា នៅវេលាម៉ោង២:៣០នាទីយប់ថ្ងៃទី១៧ មីនា ប្រជាពលរដ្ឋម្នាក់បានប្រទះឃើញសាកសពបុរសម្នាក់ត្រូវគេរុំកម្រាលពូក និងចងជើងដឹកយកទៅបោះចោលនៅលើផ្លូវបេតុងក្នុងភូមិព្រៃរមូល។

សាកសពបុរសរូបនោះមិនស្គាល់អត្តសញ្ញាណ ពាក់អាវយឺតដៃខ្លី ស្លៀកខោខូវប៊យជើងវែង មានសម្បុរស សក់កាត់ខ្លី។ សពត្រូវបានឃាតករចងរុំកម្រាលពូកពណ៌ប្រផេះ ចុងជើងទាំងសងខាងមានចងរុំដោយខោជើងវែង។

សពត្រូវបានឃាតករវាយដុំជាំភ្នែក ក្បាលពីក្រោយ និងដងខ្លួន ធ្វើទារុណកម្មរហូតដល់ស្លាប់។ សពត្រូវបានសមត្ថកិច្ចពិនិត្យទឹកនោម វិជ្ជមានសារធាតុញៀនប្រភេទមេតំហ្វេតាមីន និងអំហ្វេតាមីន។

លោកឧកញ៉ាវេជ្ជបណ្ឌិត នង សុវណ្ណរ័ត្ន គ្រូពេទ្យកោសល្យវិច័យអមតុលាការរាជធានីភ្នំពេញបានសន្និដ្ឋានថា ជនរងគ្រោះស្លាប់ដោយប៉ះទង្គិចក្បាលធ្ងន់ធ្ងរ ជាករណីឃាតកម្ម។

បន្ទាប់ពីមានករណីឃាតកម្មរំលងបាន១ថ្ងៃ សមត្ថកិច្ចឈានទៅស្រាវជ្រាវឃាត់បានជនសង្ស័យម្នាក់។ ចំណែកបក្សពួក២នាក់ទៀតដែលជាជនដៃដល់បានគេចខ្លួនបាត់។

ករណីនេះបង្ហាញពីភាពសាហាវឃោរឃៅរបស់ឃាតករ ដែលវាយសម្លាប់ជនរងគ្រោះយ៉ាងឃោរឃៅ រួចរុំកម្រាលពូកបោះចោលកណ្តាលផ្លូវ។ សមត្ថកិច្ចនៅតែបន្តស្រាវជ្រាវដើម្បីឃាត់ខ្លួនជនសង្ស័យពីរនាក់ទៀត។