By ខេត្តស្ទឹងត្រែង – ក្នុងដំណើរបេសកកម្មគោលដៅទី៦ លោកបណ្ឌិត ជ្រុន ថេរ៉ាវ៉ាត អនុប្រធានយុវជនគណបក្សថ្នាក់កណ្ដាល បានអញ្ជើញជាអធិបតីក្នុងវេទិកា «ពិភាក្សាជាមួយយុវជនខេត្តស្ទឹងត្រែង» នាព្រឹកថ្ងៃទី២១ ខែមីនា ឆ្នាំ២០២៦។
អង្គពិធីនេះមានការចូលរួមពីលោក សរ សុពុត្រា ប្រធានគណៈកម្មាធិការគណបក្សខេត្តស្ទឹងត្រែង និងជាប្រធានយុវជនគណបក្សខេត្ត ព្រមទាំងថ្នាក់ដឹកនាំ សមាជិក សមាជិកា និងយុវជនចំនួន៤០០រូប។
លោកបណ្ឌិត ជ្រុន ថេរ៉ាវ៉ាត បានផ្ដាំផ្ញើសាកសួរសុខទុក្ខពីសម្ដេចធិបតី និងលោកជំទាវបណ្ឌិត ព្រមទាំងសម្ដែងការកោតសរសើរចំពោះសមិទ្ធផលដែលខេត្តស្ទឹងត្រែងបានសម្រេច។
ក្នុងអង្គពិធី លោកបណ្ឌិតបានជម្រាបពីការខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការដោះស្រាយជម្លោះព្រំដែនជាមួយថៃតាមរយៈយន្តការទូត ច្បាប់ និងសារព័ត៌មាន។
យុវជនបានលើកឡើងនូវបញ្ហាសំខាន់ៗជាច្រើន រួមមាន៖ ស្ថានភាពនយោបាយក្នុងប្រទេស បញ្ហាព្រំដែនកម្ពុជា-ថៃ ការឈ្លានពានរបស់យោធាថៃ ការនាំចូលទំនិញថៃ ការពហិការមិនប្រើទំនិញថៃ ការចុះបញ្ជីដីធ្លី និងបញ្ហាសង្គមផ្សេងៗទៀត។
លោកបណ្ឌិតបានផ្ដល់អនុសាសន៍សំខាន់ៗ៨ចំណុច រួមមាន៖ ពង្រឹងសាមគ្គីភាព លើកកម្ពស់ស្មារតីស្នេហាជាតិ បញ្ជ្រាបគោលនយោបាយរដ្ឋាភិបាល ត្រៀមខ្លួនសម្រាប់ការបោះឆ្នោត២០២៧-២០២៨ ប្រយុទ្ធប្រឆាំងព័ត៌មានក្លែងក្លាយ និងការពារបូរណភាពទឹកដី។
«យើងមិនត្រូវភ្លេចពីមហិច្ឆតាឈ្លានពានពីសំណាក់យោធាថៃទេ។ យើងត្រូវចងចាំពីការឈឺចាប់ ការធ្វើបាប និងការបំផ្លិចបំផ្លាញអាយុប្រជាជនស្លូតត្រង់ ហេដ្ឋារចនាសម្ព័ន្ធជាតិ ផ្ទះសម្បែង ផ្លូវថ្នល់ វត្តអារាម មន្ទីពេទ្យ សាលារៀន និងប្រាង្គប្រាសាទរបស់យើង» លោកបណ្ឌិតបានអនុសាសន៍។
វេទិកានេះបានប្រព្រឹត្តទៅយ៉ាងរស់រវើក ដោយមានការចូលរួមយោបល់ សំណួរ និងសំណូមពរជាច្រើនពីសំណាក់យុវជន ដែលបង្ហាញពីភាពស្និទ្ធស្នាល និងការផ្សារភ្ជាប់រវាងថ្នាក់ដឹកនាំ និងថ្នាក់មូលដ្ឋាន។
លោកបណ្ឌិតក៏បានលើកទឹកចិត្តដល់សមាជិក-សមាជិកាទាំងអស់បន្តការផ្ញើសំណួរ និងសំណូមពរបន្ថែមតាមរយៈក្រុមការងារនាពេលក្រោយ។
អង្គពិធីបានបញ្ចប់ដោយជោគជ័យ ដោយមានការយល់ព្រមពីគណៈកម្មាធិការបក្សខេត្តស្ទឹងត្រែងក្នុងការរៀបចំវេទិកាស្រដៀងគ្នាទៅតាមថ្នាក់ក្រុង ស្រុកទាំង៥ ដើម្បីផ្សព្វផ្សាយគោលនយោបាយវិស័យការពារជាតិ កសិកម្ម និងវិស័យផ្សេងៗទៀត។
