By 
ភ្នំពេញ៖ រដ្ឋបាលខណ្ឌពោធិ៍សែនជ័យបានចេញសេចក្តីជូនដំណឹងឱ្យអាជីវករទាំងអស់ដែលលក់ដូរលើចិញ្ចើមផ្លូវ និងផ្លូវសាធារណៈមុខផ្សារជម្ពូវ័ន ធ្វើការរុះរើចេញជាបន្ទាន់ក្នុងរយៈពេល៧ថ្ងៃ។
ការសម្រេចចិត្តនេះធ្វើឡើងដើម្បីរក្សាសណ្តាប់ធ្នាប់ របៀបរៀបរយសាធារណៈ អនាម័យ និងបរិស្ថានល្អប្រសើរ ព្រមទាំងជៀសវាងការកកស្ទះចរាចរណ៍នៅតាមបណ្តោយផ្លូវជាតិលេខ៤ ក្នុងតំបន់ភូមិជម្ពូវ័ន២ សង្កាត់ចោមចៅទី៣។
រដ្ឋបាលខណ្ឌបានណែនាំឱ្យបញ្ឈប់រាល់ការដាក់តាំងលក់ទំនិញ ស្លាកយីហោ តូបលក់ដូរ និងការសាងសង់ផ្សេងៗដែលរំលោភលើចិញ្ចើមផ្លូវសាធារណៈ។ លើសពីនេះ ត្រូវបញ្ឈប់ការចតយានយន្តគ្រប់ប្រភេទនៅលើចិញ្ចើមផ្លូវ។
ចំពោះបញ្ហាអនាម័យ អាជីវករត្រូវសម្អាតខាងមុខទីតាំងអាជីវកម្មឱ្យបានស្អាតជានិច្ច និងរៀបចំកាកសំណល់ឱ្យបានត្រឹមត្រូវ។ រដ្ឋបាលខណ្ឌស្នើឱ្យធ្វើការរុះរើតាមការណែនាំខាងលើចេញឱ្យអស់ក្នុងរយៈពេល៧ថ្ងៃ។
ក្នុងករណីមិនអនុវត្តតាម រដ្ឋបាលខណ្ឌនឹងអនុវត្តវិធានការរដ្ឋបាល និងមិនទទួលខុសត្រូវចំពោះការបាត់បង់ ឬខូចខាតទ្រព្យសម្បត្តិណាមួយឡើយ។ រដ្ឋបាលខណ្ឌសង្ឃឹមថាប្រជាពលរដ្ឋនិងអាជីវករទាំងអស់នឹងយល់ព្រមអនុវត្តតាម។
