By គ្រោះអគ្គិភ័យដ៏គួរឲ្យរន្ធត់បានឆាបឆេះក្រុមទូកនេសាទចំនួន៨គ្រឿងនៅកំពង់ទូកស្រុក Khanom ខេត្ត Nakhon Si Thammarat នៅវេលាម៉ោង១រំលងអធ្រាត្រថ្ងៃសុក្រ ទី២០ មីនា ២០២៦។
អណ្តាតភ្លើងបានរីករាលដាលយ៉ាងរហ័សពីទូកមួយទៅទូកមួយទៀតដោយសារខ្យល់បក់បោកខ្លាំង។ ក្រុមពន្លត់អគ្គិភ័យបានចំណាយពេល៤ម៉ោងទើបអាចគ្រប់គ្រងស្ថានការណ៍បាន ប៉ុន្តែទូកទាំង៨គ្រឿងត្រូវឆេះខ្ទេចអស់ បង្កឲ្យមានការខូចខាតលើសពី១០លានបាត (ប្រហែល៣០ម៉ឺនដុល្លារ)។
តាមការរាយការណ៍ ទូកទាំងនេះជាកម្មសិទ្ធិរបស់គ្រួសារអតីតសមាជិកសភា និងជាក្រុមទូកនេសាទធំបំផុតមួយនៅក្នុងខេត្ត។ អាជ្ញាធរសង្ស័យថាមូលហេតុអាចមកពីឆ្លងចរន្តអគ្គិសនី ប៉ុន្តែក៏មិនទាន់ទាត់ចោលលទ្ធភាពដែលជាការលួចដុតដោយចេតនាដែរ។
មានការសង្ស័យពីមហាជនថា ករណីនេះអាចពាក់ព័ន្ធនឹងបញ្ហាខឹងសម្បារពីកង្វះខាតប្រេងឥន្ធនៈ និងតម្លៃប្រេងឡើងថ្លៃនៅក្នុងតំបន់ ប៉ុន្តែប៉ូលិសមិនទាន់បានបញ្ជាក់ផ្លូវការនូវការអះអាងនេះនៅឡើយទេ។
បច្ចុប្បន្ន កម្លាំងនគរបាល និងអង្គភាពជើងទឹកកំពុងពិនិត្យមើលបំណែកទូក និងវាយតម្លៃពីផលប៉ះពាល់ដល់រចនាសម្ព័ន្ធកំពង់ទូកទាំងមូល ខណៈមន្ត្រីជំនាញកំពុងធ្វើកោសល្យវិច័យដើម្បីស្វែងរកការពិត។
