អង់គ្លេសបើកផ្លូវឲ្យអាមេរិកប្រើមូលដ្ឋានទ័ពវាយអ៊ីរ៉ង់ – សម្ពាធពីត្រាំ និងប្រជាជនប្រឆាំង

រដ្ឋាភិបាលអង់គ្លេសបានសម្រេចផ្ដល់សិទ្ធិឲ្យសហរដ្ឋអាមេរិកប្រើប្រាស់មូលដ្ឋានទ័ពនៅលើទឹកដីរបស់ខ្លួន ដើម្បីធ្វើការវាយប្រហារទៅលើទីតាំងមីស៊ីលរបស់អ៊ីរ៉ង់។ ការសម្រេចចិត្តរសើបនេះត្រូវបានធ្វើឡើងក្រោយកិច្ចប្រជុំនៅវិមាន Downing Street កាលពីថ្ងៃទី២១ ខែមីនា ឆ្នាំ២០២៦។

ដំបូងឡើយ លោកនាយករដ្ឋមន្ត្រី Keir Starmer បានបដិសេធមិនឲ្យអាមេរិកប្រើមូលដ្ឋានទ័ពអង់គ្លេសទេ ប៉ុន្តែបានប្ដូរចិត្តបន្ទាប់ពីអ៊ីរ៉ង់បានបាញ់មីស៊ីលទៅលើសម្ព័ន្ធមិត្តអង់គ្លេសនៅមជ្ឈិមបូព៌ា។ លោកបានអនុញ្ញាតឲ្យកងទ័ពអាមេរិកប្រើមូលដ្ឋានទ័ពអាកាស RAF Fairford និងមូលដ្ឋានទ័ពចម្រុះនៅកោះ Diego Garcia។

រដ្ឋមន្ត្រីការបរទេសអ៊ីរ៉ង់លោក Abbas Araqchi បានថ្កោលទោសសកម្មភាពនេះ ដោយបង្ហោះលើបណ្ដាញសង្គម X ថា លោក Starmer កំពុងដាក់ជីវិតប្រជាជនអង់គ្លេសក្នុងគ្រោះថ្នាក់។ លោកបានដាស់តឿនថា អ៊ីរ៉ង់នឹងប្រើសិទ្ធិការពារខ្លួនដើម្បីឆ្លើយតបវិញ។

សម្ពាធកើនឡើងទៀត នៅពេលដែលលោកដូណាល់ ត្រាំ បានរិះគន់ថា អង់គ្លេសលែងជាសម្ព័ន្ធមិត្តដែលគួរទុកចិត្តដូចមុនទៀត។ ទោះជាយ៉ាងណា រដ្ឋាភិបាលអង់គ្លេសនៅតែអំពាវនាវឲ្យមានការបន្ធូរបន្ថយភាពតានតឹង។

ការស្ទង់មតិបង្ហាញថា ប្រជាជនអង់គ្លេស៥៩% ប្រឆាំងនឹងសកម្មភាពយោធារួមគ្នារបស់អាមេរិក និងអ៊ីស្រាអែលនៅក្នុងតំបន់។