By ភ្នំពេញ៖ អាជ្ញាធរខណ្ឌសែនសុខ បានសហការយ៉ាងជិតស្និទ្ធជាមួយមន្ទីរសាធារណការរាជធានីភ្នំពេញ ក្នុងការដាក់រថយន្តបូមស្តារ និងកាយសំរាមចេញពីរីហ្គាលូ ដើម្បីសម្រួលដល់ការធ្វើដំណើររបស់ប្រជាពលរដ្ឋ។
សកម្មភាពនេះបានធ្វើឡើងក្រោយពីមានភ្លៀងធ្លាក់ខ្លាំងនៅតំបន់មួយចំនួន ដែលបណ្តាលឱ្យមានការដក់ទឹក និងធ្វើឱ្យប្រព័ន្ធលូហូរយឺត ស្ទះទៅដោយសំរាម និងដី។ ក្រុមការងារបានចុះទៅសំអាតតាមប្រព័ន្ធលូ និងផ្លូវបេតុងប្របសាលាបឋមសិក្សា ប៊ុន រ៉ានីហ៊ុនសែន សាម្គី ដែលស្ថិតក្នុងភូមិដំណាក់ សង្កាត់គោកឃ្លាង ខណ្ឌសែនសុខ។
អាជ្ញាធរបានបញ្ជាក់ថា ការបូមស្តារ និងសំអាតសំរាមចេញពីរីហ្គាលូនេះ នឹងចំណាយពេលរយៈពេល៣ថ្ងៃ ចាប់ពីថ្ងៃទី១៨ ដល់ថ្ងៃទី២០ ខែមីនា ឆ្នាំ២០២៦។
អាជ្ញាធរខណ្ឌសែនសុខ ក៏បានអំពាវនាវដល់ប្រជាពលរដ្ឋទាំងអស់ ឱ្យរួមចំណែកវិភាគទានក្នុងការទុកដាក់សំរាមឱ្យបានត្រឹមត្រូវ ក្នុងធុងសំរាមដែលអាជ្ញាធរបានដាក់តាមគោលដៅនីមួយៗ ដើម្បីរក្សាបរិស្ថានស្អាត និងការពារការដក់ទឹកនៅពេលមានភ្លៀងធ្លាក់។
សកម្មភាពនេះបង្ហាញពីការយកចិត្តទុកដាក់របស់អាជ្ញាធរក្នុងការធានាបាននូវសុវត្ថិភាព និងភាពងាយស្រួលក្នុងការធ្វើដំណើររបស់ប្រជាពលរដ្ឋ ព្រមទាំងរក្សាបរិស្ថានទីក្រុងឱ្យស្អាតស្អំ។
