By (រាជធានីភ្នំពេញ)៖ ក្រសួងធនធានទឹក និងឧតុនិយមបានចេញសេចក្តីជូនដំណឹងអំពីស្ថានភាពអាកាសធាតុដែលត្រូវប្រុងប្រយ័ត្នចាប់ពីថ្ងៃទី២១ ដល់ទី២៣ ខែមីនា ឆ្នាំ២០២៦ នេះ។ ប្រជាពលរដ្ឋត្រូវបង្កើនការប្រុងប្រយ័ត្នខ្ពស់ជាងមុន។
យោងតាមការព្យាករណ៍អាកាសធាតុ បណ្តាខេត្តមួយចំនួននៅតំបន់វាលទំនាប រួមមានរាជធានីភ្នំពេញ សៀមរាប កំពង់ចាម កំពង់ធំ កណ្ដាល និងខេត្តជុំវិញ ព្រមទាំងតំបន់ខ្ពង់រាបដូចជាខេត្តប៉ៃលិន និងព្រះវិហារ អាចនឹងមានភ្លៀងធ្លាក់ក្នុងកម្រិត ១០ភាគរយនៃផ្ទៃដី។ ភ្លៀងនេះនឹងលាយឡំដោយបាតុភូតផ្គរ រន្ទះ និងខ្យល់កន្ត្រាក់។
ដោយឡែកសម្រាប់តំបន់មាត់សមុទ្រ រួមមានខេត្តកោះកុង ព្រះសីហនុ និងកំពត លទ្ធភាពនៃការមានភ្លៀងធ្លាក់គឺមានកម្រិតខ្ពស់ជាងបន្តិច ពោលគឺរហូតដល់ ១៥ភាគរយនៃផ្ទៃដី។
ទោះបីជាអាកាសធាតុទូទៅមានភាពក្តៅហួតហែងជាមួយនឹងសីតុណ្ហភាពអតិបរមាអាចឡើងដល់ ៣៦អង្សាសេក្តី ប៉ុន្តែបាតុភូតខ្យល់កន្ត្រាក់ និងផ្គររន្ទះដែលកើតឡើងភ្លាមៗនៅតែជាហានិភ័យដែលប្រជាពលរដ្ឋមិនគួរមើលរំលងឡើយ។
អាស្រ័យហេតុនេះ សាធារណជនគួរតាមដានព័ត៌មានអាកាសធាតុឱ្យបានជាប់ជាប្រចាំ ដើម្បីត្រៀមលក្ខណៈការពារសុវត្ថិភាពផ្ទាល់ខ្លួន និងក្រុមគ្រួសារក្នុងអំឡុងពេលប៉ុន្មានថ្ងៃខាងមុខនេះ។
អត្ថបទសរសេរដោយ សហការី | កែសម្រួលដោយ Voeurn Savoth
