By អេឡុន ម៉ាស្ក៍ អ្នកជំនួញមានទ្រព្យសម្បត្តិច្រើនជាងគេបំផុតក្នុងពិភពលោក បានប្រកាសថា គាត់ត្រៀមខ្លួនជួយបង់ប្រាក់ខែជំនួសឱ្យបុគ្គលិកសន្តិសុខអាកាសយានដ្ឋានអាមេរិក (TSA) ក្នុងអំឡុងពេលវិបត្តិថវិកាដែលកំពុងបន្ត។
លោកម៉ាស្ក៍បានលើកឡើងកាលពីថ្ងៃសៅរ៍ថា គាត់នឹងជួយបង់ប្រាក់ខែឱ្យបុគ្គលិកនៃ Transportation Security Administration ដែលកំពុងប្រឈមមុខនឹងការបញ្ឈប់ទទួលប្រាក់ខែជាលើកទីពីរក្នុងរយៈពេល ៦ ខែ ដោយសារការខ្វះថវិការដ្ឋាភិបាល។ វិបត្តិថវិកានេះពាក់ព័ន្ធនឹងក្រសួងមេគឺ Department of Homeland Security ដែលបានបន្តអស់រយៈពេល ៥ សប្តាហ៍។
បុគ្គលិក TSA ជាច្រើនកំពុងជិតខាតប្រាក់ខែជាលើកទីពីរ ប៉ុន្តែត្រូវបានបង្ខំឱ្យបន្តធ្វើការដដែលៗ ខណៈពេលដែលពេលរង់ចាំនៅព្រលានយន្តហោះខ្លះៗបានពន្យារពេលដល់ជាច្រើនម៉ោង។
ក្នុងការបង្ហោះលើបណ្ដាញសង្គម X លោកម៉ាស្ក៍បាននិយាយថា៖ “ខ្ញុំចង់ផ្តល់ជំនួយបង់ប្រាក់ខែសម្រាប់បុគ្គលិក TSA ក្នុងអំឡុងពេលវិបត្តិថវិកានេះ ដែលកំពុងប៉ះពាល់អវិជ្ជមានដល់ជីវិតប្រជាជនអាមេរិកជាច្រើននៅតាមព្រលានយន្តហោះទូទាំងប្រទេស។”
ក្រុមហ៊ុនអាកាសចរណ៍ និងក្រុមទេសចរណ៍បានព្រមានថា ការខកខានការងាររបស់បុគ្គលិក TSA ប្រហែល ៥០,០០០ នាក់ អាចនឹងកើនឡើងបន្ថែមទៀតនៅចុងសប្តាហ៍នេះ។ តាមទិន្នន័យរដ្ឋាភិបាល បុគ្គលិក TSA មានប្រាក់ខែជាមធ្យមប្រហែល ៦១,០០០ ដុល្លារ ក្នុងមួយឆ្នាំ។
បច្ចុប្បន្ន ព្រលានយន្តហោះមួយចំនួនកំពុងរៀបចំការបរិច្ចាគអាហារ និងជំនួយផ្សេងៗ ដើម្បីជួយបុគ្គលិកសន្តិសុខដែលកំពុងរងផលប៉ះពាល់។
កាលពីឆ្នាំមុន លោក ដូណាល់ ត្រាំ ក៏បាននិយាយថា អ្នកឧបត្ថម្ភមានទ្រព្យសម្បត្តិម្នាក់បានផ្តល់ប្រាក់ ១៣០ លានដុល្លារ ដើម្បីជួយគាំទ្រប្រាក់ខែយោធា ក្នុងអំឡុងពេលបិទរដ្ឋាភិបាលដែលមានរយៈពេល ៤៣ ថ្ងៃ ដែលជារយៈពេលវែងបំផុតក្នុងប្រវត្តិសាស្ត្រអាមេរិក៕
ដោយ៖ ភារៈ
