អាមេរិកផ្ដល់អាទិភាពបំពេញស្តុកអាវុធផ្ទាល់ខ្លួន ជាងផ្ដល់ទៅអ៊ុយក្រែន

រដ្ឋមន្ត្រីក្រសួងការពារជាតិសហរដ្ឋអាមេរិក លោក Pete Hegseth បានបញ្ជាក់ថា ក្រសួងការពារជាតិអាមេរិកកំពុងផ្ដល់អាទិភាពដល់ការបំពេញស្តុកអាវុធរបស់ខ្លួនឡើងវិញ ជំនួសឱ្យការបញ្ជូនអាវុធទាំងនោះទៅអ៊ុយក្រែន។

ការលើកឡើងនេះត្រូវបានធ្វើឡើងកាលពីថ្ងៃព្រហស្បតិ៍កន្លងទៅ អំឡុងសន្និសីទសារព័ត៌មានជាមួយឧត្តមសេនីយ៍កងទ័ពអាកាស លោក Dan Caine។ លោក Hegseth បានស្ដីបន្ទោសរដ្ឋបាលអតីតប្រធានាធិបតី Joe Biden ពីបញ្ហាប្រឈមនានាដែលយោធាអាមេរិកកំពុងប្រឈមនាពេលថ្មីៗនេះ។

ក្នុងអំឡុងសន្និសីទ លោក Hegseth បានឆ្លើយតបទៅនឹងសំណួរអំពីថវិកាក្នុងប្រតិបត្តិការសង្គ្រាមចំនួន ២០០ប៊ីលានដុល្លារ ដែលកំពុងស្វែងរកពីសភាក្នុងសង្គ្រាមនៅអ៊ីរ៉ង់។ លោកបានបញ្ជាក់ថា ការពិភាក្សាកំពុងដំណើរការ ហើយថវិកាបន្ថែមអាចកើនឡើងលើសពីចំនួនសរុប។

«ខ្ញុំគិតថាចំនួននោះអាចកើនឡើងរហូតដល់ ២០០ប៊ីលានដុល្លារ ឬលើសនេះ។ យើងត្រូវការប្រាក់ទាំងនោះ ដើម្បីសម្លាប់មនុស្សអាក្រក់» លោក Hegseth បាននិយាយ។

មន្ត្រីរូបនេះបានចង្អុលទៅកាន់រដ្ឋបាលមុនរបស់លោក Joe Biden ថា៖ «ថវិកាបន្ថែមនេះគឺយើងត្រូវការដើម្បីបំពេញស្តុកយោធាអាមេរិក ក្នុងការធានាថាយើងទទួលបានមូលនិធិត្រឹមត្រូវ សម្រាប់ធ្វើអ្វីដែលយើងអាចត្រូវធ្វើបាននាពេលអនាគត»។

លោកបានបន្តថា៖ «យើងក៏កំពុងដោះស្រាយជាមួយគម្រោងការដែលលោក Joe Biden បានបង្កើតឡើង! វាកំពុងបំផ្លាញស្តុកអាវុធទាំងនោះ ហើយមិនបានបញ្ជូនទៅឱ្យយោធារបស់យើងទេ ប៉ុន្តែទៅអ៊ុយក្រែនទៅវិញ។ ពោលគឺរាល់ពេលដែលយើងត្រលប់ទៅមើលបញ្ហាប្រឈមណាមួយដែលយើងមាន គឺជាការបញ្ជូនអាវុធទាំងនោះទៅអ៊ុយក្រែន។ យើងគិតថាគ្រាប់រំសេវទាំងនោះ គួរតែចំណាយឱ្យត្រូវផ្លូវសម្រាប់ផលប្រយោជន៍ផ្ទាល់ខ្លួនរបស់យើងក្នុងពេលនេះ»។