By រាជធានីភ្នំពេញ៖ កម្លាំងអាវុធហត្ថរាជធានីភ្នំពេញ សហការជាមួយកម្លាំងអាវុធហត្ថខណ្ឌដូនពេញ បានធ្វើប្រតិបត្តិការបង្ក្រាប និងឃាត់រថយន្ត និងម៉ូតូកែឆ្នៃជាច្រើនគ្រឿង ដែលប្រើប្រាស់ខុសបច្ចេកទេសនៅតំបន់បឹងកក់។
ប្រតិបត្តិការខាងលើនេះ បានធ្វើឡើងនៅវេលាម៉ោង ១២រំលងអធ្រាត្រចូលថ្ងៃទី២១ ខែមិនា ឆ្នាំ២០២៦ នៅតំបន់បឹងកក់ សង្កាត់ស្រះចក ខណ្ឌដូនពេញ រាជធានីភ្នំពេញ។
តាមប្រភពព័ត៌មានពីកម្លាំងអាវុធហត្ថ បានឱ្យដឹងថា នៅយប់ថ្ងៃប្រតិបត្តិការ កម្លាំងអាវុធហត្ថរាជធានីភ្នំពេញ សហការជាមួយកម្លាំងអាវុធហត្ថខណ្ឌដូនពេញ បានដាក់គោលដៅនៅក្នុងតំបន់បឹងកក់ ដើម្បីជួយទប់ស្កាត់បទល្មើសផ្សេងៗ និងលើមធ្យោបាយកែឆ្នៃបំពង់ស៊ីម៉ាំង ដែលធ្វើឱ្យប៉ះពាល់ដល់ពលរដ្ឋរស់នៅក្បែរនោះ ក៏ដូចជាបាត់បង់សណ្តាប់ធ្នាប់សាធារណៈ។
កម្លាំងបានធ្វើការបង្ក្រាប ឃាត់បានម៉ូតូចំនួន១១គ្រឿង និងរថយន្ត២គ្រឿង ដែលកែឆ្នៃបំពង់ស៊ីម៉ាំងខុសបច្ចេកទេសផងដែរ (ក្នុងនោះមានរថយន្តមួយគ្រឿងរបស់តារារ៉េបម្នាក់ផងដែរ)។
ក្រោយរង្វង់ប្រតិបត្តិការនេះ បន្ទាប់ពីឃាត់បាន កម្លាំងជំនាញបានយកមធ្យោបាយទាំងអស់ ទៅរក្សាទុកនៅបញ្ជាការដ្ឋានកងរាជអាវុធហត្ថរាជធានីភ្នំពេញ អនុវត្តតាមគោលការណ៍។
អត្ថបទសរសេរដោយ យឹម ឈឿន
កែសម្រួលដោយ ធីតា
