By ខេត្តកណ្ដាល៖ ស្ថានភាពគ្រឿងញៀនបាននាំឱ្យយុវជនពីរនាក់ទាស់ទែងគ្នា រហូតឈានដល់ការវាយគ្នា ដែលបណ្ដាលឱ្យយុវជនម្នាក់ស្លាប់ដោយសារត្រូវច្របាច់កនៅថ្ងៃទី២២ ខែមីនា ឆ្នាំ២០២៦ វេលាម៉ោង២៣:២០នាទី នៅឃ្លាំងធ្វើក្ដារមឈូស ភូមិប្រាសាទ ឃុំឈ្វាំង ស្រុកពញាឮ។
មន្ត្រីនគរបាលស្រុកពញាឮបានបញ្ជាក់ថា ជនរងគ្រោះឈ្មោះ ហៀង សុភ័ក្ក្រ (២៧ឆ្នាំ) ជាកម្មករសំណង់ រីឯជនសង្ស័យឈ្មោះ សែម ចន (២៥ឆ្នាំ) ក៏ជាកម្មករសំណង់ដែរ ដោយទាំងពីរនាក់មានទីលំនៅនៅភូមិប្រាសាទ ឃុំឈ្វាំង។ លទ្ធផលពិនិត្យទឹកនោមបង្ហាញថា ជនសង្ស័យមានសារធាតុញៀន។
តាមការស៊ើបអង្កេត នៅពេលកើតហេតុ ជនសង្ស័យបានជិះម៉ូតូទៅឃ្លាំងលក់ក្តារមឈូស ហើយបានជួបជនរងគ្រោះដែលកំពុងស្នាក់នៅទីនោះ។ ទាំងពីរបាននាំគ្នាប្រើប្រាស់គ្រឿងញៀនរួមគ្នា។ ក្រោយមក ជនសង្ស័យបានសុំយកខោដែលខ្ចីពីជនរងគ្រោះមកវិញ តែត្រូវបានជនរងគ្រោះឆ្លើយតបដោយសម្តីឈ្លើយ។
ភ្លាមនោះ ជនសង្ស័យដែលមានអារម្មណ៍ខឹងសម្បាបានស្ទុះទៅវាយជនរងគ្រោះ ធ្វើឱ្យជនរងគ្រោះដួល ហើយបានឡើងទៅពីលើ ចាប់ច្របាច់ករហូតដាច់ខ្យល់ស្លាប់។ បន្ទាប់ពីការសម្លាប់ ជនសង្ស័យបានស្រាតខោពីខ្លួនជនរងគ្រោះ រួចគេចខ្លួនបាត់។
សាច់ញាតិជនរងគ្រោះបានដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលឈ្វាំង ហើយកម្លាំងសមត្ថកិច្ចបានចុះស៊ើបអង្កេត និងឃាត់ខ្លួនជនសង្ស័យបានសម្រេច។ នៅចំពោះមុខសមត្ថកិច្ច ជនសង្ស័យបានទទួលសារភាពថា ខ្លួនធ្វើសកម្មភាពនេះដោយសារខឹងជនរងគ្រោះដែលមិនព្រមអោយខ្ចីខោវិញ និងប្រើសម្តីឈ្លើយ។
ថ្ងៃទី២៣ មីនា ក្រុមបច្ចេកទេសបានចុះធ្វើកោសល្យវិច័យសាកសព រួចបានប្រគល់សាកសពទៅគ្រួសារដើម្បីធ្វើបុណ្យតាមប្រពៃណី។ បច្ចុប្បន្ន ជនសង្ស័យកំពុងឃាត់ខ្លួននៅអធិការដ្ឋាននគរបាលស្រុកពញាឮ ដើម្បីសូរនាំ និងកសាងសំណុំរឿងតាមនីតិវិធី។
ដោយ៖ ស្អាងជ័យ
