ក្រុងកំពង់ចាមរីកចម្រើនជាមួយប្រព័ន្ធលូទឹកកខ្វក់ថ្មី រដ្ឋមន្ត្រីសាធារណការជំរុញដោះស្រាយបញ្ហាជាមួយពលរដ្ឋ

ខេត្តកំពង់ចាម – កិច្ចប្រជុំពិសេសដើម្បីត្រួតពិនិត្យវឌ្ឍនភាពគម្រោងសាងសង់ប្រព័ន្ធលូរំដោះទឹកកខ្វក់និងស្ថានីយ៍ប្រព្រឹត្តិកម្មទឹកកខ្វក់បានធ្វើឡើងនៅសាលាខេត្តកំពង់ចាម នាព្រឹកថ្ងៃទី២២ ខែមីនា ឆ្នាំ២០២៦។

កិច្ចប្រជុំនេះមានការចូលរួមពីសំណាក់ឯកឧត្តមប៉េង ពោធ៏នា រដ្ឋមន្ត្រីក្រសួងសាធារណការនិងដឹកជញ្ជូន រួមជាមួយឯកឧត្តមអ៊ុន ចាន់ដា អភិបាលខេត្តកំពង់ចាម។ កិច្ចប្រជុំផ្តោតលើការដោះស្រាយបញ្ហាដែលនៅសេសសល់ជាមួយប្រជាពលរដ្ឋ ដើម្បីធានាឲ្យក្រុងកំពង់ចាមមានផ្លូវល្អ ប្រព័ន្ធលូស្អាត និងក្លាយជាកន្លែងទាក់ទាញទេសចរណ៍។

តំណាងក្រុមហ៊ុនស្ថាបនាបានរាយការណ៍ថា គម្រោងស្ថាបនាប្រព័ន្ធលូរំដោះទឹកកខ្វក់បានសម្រេចវឌ្ឍនភាព៨៣%។ ការងារភ្ជាប់លូទឹកកខ្វក់ចូលផ្ទះនិងអគារចំនួន៣,៩៧៥កន្លែង បណ្ដាញលូស្ថាបនាប្រវែង៥១គីឡូម៉ែត្រ បណ្ដាញលូទឹកកខ្វក់បឋមនិងបន្ទាប់បន្សំប្រវែង៣៣គីឡូម៉ែត្រ និងបណ្ដាញលូមេប្រវែង១,៤គីឡូម៉ែត្រ។

ទោះជាយ៉ាងណា នៅមានប្រជាពលរដ្ឋប្រមាណជាង៤០០គ្រួសារមិនទាន់បានតភ្ជាប់បណ្ដាញទឹកកខ្វក់ចូលផ្ទះនៅឡើយ។ ឯកឧត្តមរដ្ឋមន្ត្រីប៉េង ពោធ៏នា បានជំរុញឲ្យអាជ្ញាធរមូលដ្ឋាន ក្រុមហ៊ុនស្ថាបនា និងមន្ទីរសាធារណការដឹកជញ្ជូនខេត្ត រួមគ្នាដោះស្រាយបញ្ហាដោយពន្យល់ឲ្យពលរដ្ឋយល់និងបន្តការងារដោយជោគជ័យ។

ឯកឧត្តមរដ្ឋមន្ត្រីបានបញ្ជាក់ថា កិច្ចសន្យាស្ថាបនាដែលគ្រោងបញ្ចប់នៅចុងខែឧសភា ឆ្នាំ២០២៦ នឹងត្រូវពន្យារពេលដោយសារទំហំការងារជាក់ស្ដែង។ ប្រព័ន្ធនេះនឹងបំលែងទឹកកខ្វក់ទៅជាទឹកស្អាតដោយមិនមានក្លិនអាក្រក់ ដែលនឹងជួយលើកតម្កើងវិស័យទេសចរណ៍នៅក្រុងកំពង់ចាម។

ឯកឧត្តមវង្ស វិសុទ្ធ អនុរដ្ឋលេខាធិការក្រសួងសាធារណការ ក៏កំពុងធ្វើការដោះស្រាយជាមួយក្រុមហ៊ុនស្ថាបនាដែរ។ គម្រោងនេះរួមមានស្ថានីយ៍ចំនួន៣កន្លែង ដែលនឹងធានាបាននូវបរិស្ថានស្អាតស្អំសម្រាប់ក្រុងកំពង់ចាម។

ក្រុមហ៊ុនស្ថាបនាបានប្តេជ្ញាថានឹងប្រឹងប្រែងស្ថាបនាឲ្យរួចរាល់តាមគម្រោងផែនការ ដើម្បីធានាបាននូវប្រព័ន្ធលូទឹកកខ្វក់ដ៏ទំនើបសម្រាប់ក្រុងកំពង់ចាម ដែលនឹងជួយលើកស្ទួយគុណភាពជីវិតរបស់ប្រជាពលរដ្ឋ និងទាក់ទាញទេសចរណ៍។

អត្ថបទសរសេរដោយ យ៉ាន់ ចាន់ថេត
កែសម្រួលដោយ ធីតា