By ព្រឹកថ្ងៃទី២៣ ខែមីនា ឆ្នាំ២០២៦ ម៉ោងប្រហែល៦:១០នាទី ប្រជាពលរដ្ឋបានប្រទះឃើញបុរសម្នាក់ដេកស្លាប់នៅលើស្ពានថ្ម ផ្លូវក្រវ៉ាត់ក្រុងទី៣ ភូមិគងណយ សង្កាត់គងណយ ខណ្ឌដង្កោ រាជធានីភ្នំពេញ។
សពមានស្នាមរបួសលើផ្ទៃមុខ ខណៈសាច់ញាតិអះអាងថា បាត់ម៉ូតូម៉ាកសេ១២៥ ស៊េរីឆ្នាំ២០២៥ មួយគ្រឿងពីកន្លែងកើតហេតុ។ តាមសាច់ញាតិបានប្រាប់ថា ជនរងគ្រោះទើបតែចេញពីកន្លែងធ្វើការ និងកំពុងជិះម៉ូតូឆ្ពោះទៅផ្ទះតាមផ្លូវក្រវ៉ាត់ក្រុងទី៣។
ក្រោយទទួលបានព័ត៌មាន កម្លាំងសមត្ថកិច្ចជំនាញពាក់ព័ន្ធបានចុះមកពិនិត្យជាក់ស្តែង និងធ្វើការស្រាវជ្រាវជុំវិញទីតាំងកើតហេតុ។ សមត្ថកិច្ចកំពុងស្វែងយល់មូលហេតុនៃការស្លាប់ និងការបាត់ម៉ូតូរបស់ជនរងគ្រោះ។
សពត្រូវបានសមត្ថកិច្ចធ្វើលិខិតប្រគល់ជូនសាច់ញាតិយកទៅធ្វើបុណ្យតាមប្រពៃណី។ ការស្រាវជ្រាវនៅតែបន្តដើម្បីស្វែងរកការពិតពីហេតុការណ៍នេះ។
