By ភ្នំពេញ៖ ជនសង្ស័យចំនួន៩នាក់ ត្រូវបានកម្លាំងនគរបាលចាត់វិធានការឃាត់ខ្លួន និងបញ្ជូនទៅតុលាការ ក្រោយពីពួកគេពាក់ព័ន្ធនឹងបទល្មើសជាច្រើនក្នុងរាជធានីភ្នំពេញ។
ការប្រតិបត្តិការនេះដឹកនាំដោយកម្លាំងការិយាល័យនគរបាលព្រហ្មទណ្ឌកំរិតស្រាល ដោយសហការជាមួយកម្លាំងអធិការពីខណ្ឌផ្សេងៗ រួមមានខណ្ឌកំបូល ខណ្ឌមានជ័យ ខណ្ឌព្រែកព្នៅ និងខណ្ឌពោធិសែនជ័យ។
បទល្មើសសំខាន់ៗដែលជនសង្ស័យត្រូវចោទប្រកាន់មាន៖
- រក្សាទុក ដឹកញ្ជូន ឬជួញដូរគ្រឿងញៀនដោយខុសច្បាប់
- កាន់កាប់អាវុធដោយគ្មានការអនុញ្ញាត
- ប្រើប្រាស់គ្រឿងញៀនដោយខុសច្បាប់
- ចាប់ឃុំឃាំង និងបង្ខាំងដោយខុសច្បាប់
- ហិង្សាដោយចេតនា
- ជំរិតទារប្រាក់
ក្នុងចំណោមជនសង្ស័យទាំង៩នាក់នោះ មាន២នាក់រងរបួសដោយលោតពីលើផ្ទះ ហើយកំពុងសម្រាកព្យាបាលនៅមន្ទីរពេទ្យ។
ការស្រាវជ្រាវរកឃើញថា ជនសង្ស័យទាំងនេះពាក់ព័ន្ធនឹងករណីបទល្មើស៣ករណីដាច់ដោយឡែកពីគ្នា៖
ករណីទី១៖ ប្លន់ម៉ូតូនិងទូរសព្ទ័
ប្រព្រឹត្តនៅខណ្ឌពោធិ៍សែនជ័យ នៅថ្ងៃទី១៧ ខែមីនា ឆ្នាំ២០២៦ ដោយយកដៃព្រួតគ្នាវាយប្លន់យកម៉ូតូម៉ាកហុងដា និងទូរសព្ទ័ដៃ។
ករណីទី២៖ ការរក្សាទុកគ្រឿងញៀន
ប្រព្រឹត្តនៅខណ្ឌព្រែកព្នៅ នៅថ្ងៃទី២០ ខែមីនា ដោយរក្សាទុក និងប្រើប្រាស់គ្រឿងញៀនដោយខុសច្បាប់។
ករណីទី៣៖ ចាប់ឃុំឃាំងខុសច្បាប់
ប្រព្រឹត្តនៅខណ្ឌកំបូល នៅថ្ងៃទី១៩ ខែមីនា ដោយចាប់ឃុំឃាំង ហិង្សា និងជំរិតទារប្រាក់។
ការប្រតិបត្តិការនេះធ្វើឡើងក្រោមការដឹកនាំផ្ទាល់ពីមេបញ្ជាការនគរបាលជាន់ខ្ពស់ រួមមានលោកនាយឧត្តមសេនីយ៍ ស ថេត អគ្គស្នងការនគរបាលជាតិ និងលោកឧត្តមសេនីយ៍ឯក ជួន ណារិន្ទ អគ្គស្នងការរង។
បច្ចុប្បន្ន ជនសង្ស័យទាំង៩នាក់ត្រូវបានបង្ហាញមុខជាសាធារណៈ ហើយបញ្ជូនខ្លួនទៅកាន់តុលាការដើម្បីអនុវត្តតាមនីតិវិធីច្បាប់។
