By យោធាអាមេរិកបានប្រកាសកាលពីថ្ងៃសៅរ៍ថា សមត្ថភាពរបស់អ៊ីរ៉ង់ក្នុងការគ្រប់គ្រងច្រកសមុទ្រ Hormuz បានធ្លាក់ចុះយ៉ាងខ្លាំង បន្ទាប់ពីការវាយប្រហារដោយគ្រាប់បែកទម្ងន់ធ្ងន់ៗរបស់អាមេរិកលើទីតាំងក្រោមដីរបស់អ៊ីរ៉ង់។
យោងតាមការផ្សាយព័ត៌មានរបស់ CNA និង AFP នៅថ្ងៃទី២២ ខែមីនា ឆ្នាំ២០២៦ យោធាអាមេរិកបានប្រើប្រាស់គ្រាប់បែកទម្ងន់ធ្ងន់ៗពីឃ្លាំងអាវុធរបស់ខ្លួន ដើម្បីទម្លុះទីតាំងមីស៊ីលអ៊ីរ៉ង់ដែលស្ថិតនៅកន្លែងជាប់គ្នាៗ។
លោក Brad Cooper មេបញ្ជាការនៃបញ្ជាការកណ្តាលសហរដ្ឋអាមេរិក (CENTCOM) បានលើកឡើងថា កងកម្លាំងយោធាអាមេរិកបានទម្លាក់គ្រាប់បែកទម្ងន់ជាង២តោន (២២៦០គីឡូក្រាម) ជាច្រើនគ្រាប់លើកន្លែងរក្សាទុកមីស៊ីលក្រោមដីរបស់អ៊ីរ៉ង់។
«យើងមិនត្រឹមតែបានរុះរើកន្លែងនោះទេ ប៉ុន្តែថែមទាំងបំផ្លាញទីតាំងចារកម្ម និងប្រព័ន្ធបញ្ជូនរ៉ាដាមីស៊ីលដែលពួកគេប្រើ ដើម្បីតាមដានចលនានាវាផងដែរ» លោក Cooper បានបង្ហោះសារក្នុងវីដេអូលើបណ្តាញសង្គម X។
លោកបន្ថែមថា៖ «សមត្ថភាពរបស់អ៊ីរ៉ង់ក្នុងការគំរាមកំហែងដល់សេរីភាពនៃការធ្វើនាវាចរណ៍ជុំវិញច្រកសមុទ្រ Hormuz ត្រូវបានធ្លាក់ចុះ ហើយយើងនឹងមិនឈប់តាមប្រមាញ់គោលដៅទាំងនេះទេ»។
ទីភ្នាក់ងារស៊ើបការណ៍សម្ងាត់របស់ CENTCOM បានបង្ហាញពីការប្រើប្រាស់គ្រាប់បែកបំផ្លាញបន្ទាយអ៊ីរ៉ង់កាលពីថ្ងៃអង្គារ ដើមសប្តាហ៍។ លោក Cooper បានពន្យល់លម្អិតអំពីផលប៉ះពាល់របស់វាកាលពីថ្ងៃសៅរ៍ ខណៈទីក្រុងវ៉ាស៊ីនតោនកំពុងស្ថិតក្រោមសម្ពាធកាន់តែខ្លាំងឡើងក្នុងការដោះស្រាយផលវិបាកនៃសង្គ្រាមនៅអ៊ីរ៉ង់លើតម្លៃប្រេង និងពាណិជ្ជកម្មពិភពលោក។
លោក Cooper បន្តថា មកដល់ពេលនេះ យោធាអាមេរិកបានវាយប្រហារគោលដៅយោធាអ៊ីរ៉ង់ជាង ៨០០០ កន្លែង រួមទាំងនាវាចំនួន ១៣០ គ្រឿងផងដែរ ក្នុងរយៈពេលបីសប្តាហ៍កន្លងមកនេះ។
