តម្លៃប្រេងអន្តរជាតិស្ទុះងើបឡើងវិញខ្លាំង បន្ទាប់ពីធ្លាក់ចុះគំហុកកាលពីម្សិលមិញ

ភ្នំពេញ – តម្លៃប្រេងអន្តរជាតិបានស្ទុះងើបឡើងវិញយ៉ាងខ្លាំងនៅក្នុងទីផ្សារអាស៊ីនាព្រឹកថ្ងៃអង្គារ (២៤ មីនា) បន្ទាប់ពីធ្លាក់ចុះជាគំហុកកាលពីថ្ងៃចន្ទ ដោយសារភាពតានតឹងនៃជម្លោះរវាងអ៊ីស្រាអែល សហរដ្ឋអាមេរិក និងអ៊ីរ៉ង់។

កាលពីថ្ងៃចន្ទ តម្លៃប្រេងកុងត្រា Brent បានធ្លាក់ចុះ ១២,២៥ ដុល្លារ (១០,៩%) មកនៅត្រឹម ៩៩,៩៤ ដុល្លារ/បារ៉ែល ខណៈតម្លៃប្រេង WTI បានធ្លាក់ចុះ ១០,១០ ដុល្លារ (១០,៣%) មកនៅត្រឹម ៨៨,១៣ ដុល្លារ/បារ៉ែល។

ទោះជាយ៉ាងណា នៅថ្ងៃអង្គារនេះ តម្លៃប្រេងបានស្ទុះងើបឡើងវិញយ៉ាងខ្លាំង ដោយប្រេង Brent កើនឡើង ៣,៧៤ ដុល្លារ (៣,៧៤%) ដល់ ១០៣,៧ ដុល្លារ/បារ៉ែល និងប្រេង WTI កើនឡើង ៣,៤២ ដុល្លារ (៣,៨៨%) ដល់ ៩១,៥៥ ដុល្លារ/បារ៉ែល។

ការកើនឡើងនេះកើតឡើងក្រោយអ៊ីរ៉ង់ច្រានចោលការអះអាងរបស់លោក ដូណាល់ ត្រាំ អំពីការចរចាជាមួយសហរដ្ឋអាមេរិក និងបានគំរាមវាយប្រហារទៅលើគោលដៅអាមេរិកថ្មីៗ។

ភាពតានតឹងនៅមជ្ឈិមបូព៌ាបន្តធ្វើឱ្យតម្លៃប្រេងមានការប្រែប្រួលខ្លាំង ដោយមុននេះតម្លៃប្រេង Brent ធ្លាប់ឡើងដល់ជាង ១១០ ដុល្លារ/បារ៉ែល ដោយសារការគំរាមគំហែងគ្នាទៅវិញទៅមករវាងប្រទេសនានា។