អាជ្ញាធរខណ្ឌដូនពេញ ប្រតិបត្តិការសម្អាតផ្លូវ និងសម្គាល់ផ្លូវសម្រាប់ថ្មើរជើង

ភ្នំពេញ៖ អាជ្ញាធរខណ្ឌដូនពេញ បានចាប់ផ្ដើមប្រតិបត្តិការសម្អាតផ្លូវ និងរៀបចំសណ្ដាប់ធ្នាប់សាធារណៈនៅតាមបណ្ដោយផ្លូវសំខាន់ៗក្នុងខណ្ឌ ដោយមានការដឹកនាំពីអភិបាលខណ្ឌ លោក ជា ខេមា។

កាលពីថ្ងៃទី២៣ មីនា ២០២៦ កម្លាំងចម្រុះរបស់គណៈបញ្ជាការឯកភាពរដ្ឋបាលខណ្ឌដូនពេញ ដឹកនាំដោយលោក កៅ សារ៉ាវុធ អភិបាលរង បានចុះត្រួតពិនិត្យរដ្ឋបាលតាមមូលដ្ឋានអាជីវកម្ម ភោជនីយដ្ឋាន និងអាហារដ្ឋានទេសចរណ៍នានា។

ក្នុងប្រតិបត្តិការនេះ ក្រុមការងារបានធ្វើការលើផ្លូវលេខ១១៨ ចាប់ពីតិរវិថីព្រះស៊ីសុវត្ថិ ដល់ផ្លូវលេខ១៣ ដោយបានរុះរោយសម្ភារៈផ្សេងៗដែលដាក់តាំងរំលោភចឹញ្ចើមផ្លូវ និងបាញ់លាងសម្អាតយ៉ាងស្អាត។

លោក កៅ សារ៉ាវុធ បានឲ្យដឹងថា៖ “ក្រុមការងារបានពិនិត្យឃើញថា ម្ចាស់លំនៅដ្ឋាន និងម្ចាស់អាជីវកម្មនៅលើដងផ្លូវលេខ១១៨ បានចូលរួមសហការជាមួយក្រុមការងារដោយរលូន។ នេះជាសញ្ញាល្អមួយសម្រាប់ការអភិវឌ្ឍទីក្រុង។”

ជាការពិសេស ក្រុមការងារបានរៀបចំបាញ់ថ្នាំសម្គាល់ផ្លូវសម្រាប់ថ្មើរជើងយ៉ាងស្អាតលើចញ្ចើមផ្លូវលេខ១១៨ ទាំងសងខាង ដែលនឹងជួយដល់សុវត្ថិភាពអ្នកថ្មើរជើង។

ដោយឡែក នៅព្រឹកថ្ងៃទី២៤ មីនា ២០២៦ កម្លាំងចម្រុះនឹងបន្តចុះអនុវត្តលើដងផ្លូវលេខ១១០ ចាប់ពីផ្លូវលេខ១៣ ដល់តិរវិថីព្រះស៊ីសុវត្ថិ ដើម្បីធានាបាននូវសណ្ដាប់ធ្នាប់ និងសុវត្ថិភាពសាធារណៈ។

ប្រតិបត្តិការនេះគ្របដណ្ដប់លើតំបន់សំខាន់ៗរួមមាន សង្កាត់ផ្សារកណ្ដាលទី១ និងសង្កាត់វត្តភ្នំ ដោយផ្ដោតលើផ្លូវលេខ១១០, ១១៨, ១៣០ និង១៣៦។

លោក ជា ខេមា អភិបាលខណ្ឌដូនពេញ បានអះអាងថា៖ “ការងារនេះគឺជាផ្នែកមួយនៃផែនការអភិវឌ្ឍទីក្រុងរបស់យើង។ យើងចង់បង្កើតបរិយាកាសស្អាត និងមានសណ្ដាប់ធ្នាប់សម្រាប់ប្រជាពលរដ្ឋទាំងអស់។”

ការងារសម្អាតផ្លូវ និងសម្គាល់ផ្លូវសម្រាប់ថ្មើរជើងនេះ នឹងជួយធ្វើឲ្យទីក្រុងមានសណ្ដាប់ធ្នាប់ល្អ និងធានាសុវត្ថិភាពដល់អ្នកថ្មើរជើង ជាពិសេសកុមារ និងពលរដ្ឋចាស់ជរា។

ដោយ៖ តារា