ក្រសួងប្រៃសណីយ៍ បណ្តុះបណ្តាលមន្ត្រីខេត្ត៧ លើប្រព័ន្ធសេវាឌីជីថល ដើម្បីបង្កើនប្រសិទ្ធភាពការងារ

ខេត្តសៀមរាប៖ ក្រសួងប្រៃសណីយ៍ និងទូរគមនាគមន៍ បានរៀបចំសិក្ខាសាលាបណ្តុះបណ្តាលស្តីពីការប្រើប្រាស់ប្រព័ន្ធផ្តល់សេវាសាធារណៈឌីជីថល ដល់មន្ត្រីមន្ទីរជំនាញពីខេត្តចំនួន៧ នាថ្ងៃទី២៣ ខែមីនា ឆ្នាំ២០២៦នេះ។

សិក្ខាសាលានេះរៀបចំឡើងក្រោមអធិបតីភាពលោក ទូច យ៉ារ៉ាន់ឌី អនុរដ្ឋលេខាធិការក្រសួងប្រៃសណីយ៍ និងទូរគមនាគមន៍ និងជាប្រធានក្រុមការងារបរិវត្តកម្មឌីជីថល។ ខេត្តដែលចូលរួមមាន៖ សៀមរាប បាត់ដំបង ឧត្តរមានជ័យ កណ្តាល កំពង់ចាម ត្បូងឃ្មុំ និងព្រៃវែង។

លោក សុខ សីហា ប្រធានមន្ទីរប្រៃសណីយ៍ និងទូរគមនាគមន៍ខេត្តសៀមរាប បានពន្យល់ថា សិក្ខាសាលានេះមានគោលបំណងបណ្តុះបណ្តាលដល់មន្ត្រីឱ្យយល់ដឹង និងចេះប្រើប្រាស់ប្រព័ន្ធឌីជីថល សម្រាប់ផ្តល់លិខិតអនុញ្ញាត វិញ្ញាបនបត្រ និងសេវាផ្សេងៗតាមប្រព័ន្ធអនឡាញ។

“ខេត្តសៀមរាបគឺជាមន្ទីរដំបូងគេបង្អស់ក្នុងចំណោមរាជធានីខេត្តទាំង២៤ ដែលបានដាក់ឱ្យដំណើរការដោយជោគជ័យនូវសេវា ‘លិខិតអនុញ្ញាតតាមប្រព័ន្ធឌីជីថល’ កាលពីថ្ងៃទី១០ ខែវិច្ឆិកា ឆ្នាំ២០២៥កន្លងទៅ” លោកប្រធានមន្ទីរបានបញ្ជាក់។

លោកបានពន្យល់បន្ថែមថា ការប្រើប្រាស់ប្រព័ន្ធសាធារណៈឌីជីថលបាននាំមកនូវតម្លាភាព និងប្រសិទ្ធភាពការងារ ដោយកាត់បន្ថយនីតិវិធីស្មុគស្មាញ ពេលវេលារដ្ឋបាល និងក្រដាសស្នាម ធ្វើឱ្យការចេញលិខិតអនុញ្ញាតមានភាពរហ័សជាងមុន។

លោក ទូច យ៉ារ៉ាន់ឌី បានមានប្រសាសន៍ថា ក្នុងបរិបទនៃការរីកលូតលាស់នៃពាណិជ្ជកម្មតាមប្រព័ន្ធអេឡិចត្រូនិក តម្រូវការសេវាបញ្ញើប្រៃសណីយ៍កំពុងកើនឡើងយ៉ាងឆាប់រហ័ស។ សិក្ខាសាលានេះគឺជាផ្នែកនៃកិច្ចខិតខំប្រឹងប្រែងរបស់ក្រសួងក្នុងការកសាងសមត្ថភាព និងអភិវឌ្ឍវិស័យប្រៃសណីយ៍ ទូរគមនាគមន៍ និងឌីជីថលនៅកម្ពុជា។

“ការប្រើប្រាស់ប្រព័ន្ធផ្ដល់សេវាសាធារណៈឌីជីថល ផ្តល់ភាពងាយស្រួលដល់មន្ត្រីរាជការក្នុងការកាត់បន្ថយពេលវេលា និងភាពសាំញ៉ាំផ្នែកប្រព័ន្ឋការងាររដ្ឋបាល។ ចំណែកអាជីវករ និងសាធារណជនអាចស្នើសុំសេវាបានគ្រប់ពេលវេលា និងគ្រប់ទីកន្លែងនិងឆាប់រហ័ស” លោកបានសង្កត់ធ្ងន់។

ការផ្លាស់ប្តូរផ្នត់គំនិតមន្ត្រី ពីការប្រើប្រាស់ក្រដាសស្នាម និងការចុះហត្ថលេខាដោយដៃ មកជាការគ្រប់គ្រងតាមប្រព័ន្ធកុំព្យូទ័រ និងហត្ថលេខាឌីជីថល គឺជាការវិវត្តន៍សំខាន់ក្នុងការធ្វើឱ្យនីតិវិធីរដ្ឋបាលមានភាពងាយស្រួលប្រសើរឡើង។

សិក្ខាសាលានេះបានផ្តោតលើការបង្កើនសមត្ថភាពមន្ត្រីក្នុងការប្រើប្រាស់បច្ចេកវិទ្យាទាន់សម័យ ដើម្បីឆ្លើយតបទៅនឹងតម្រូវការនៃសេវាបញ្ញើប្រៃសណីយ៍ដែលកំពុងកើនឡើងយ៉ាងឆាប់រហ័ស ដោយសារការរីកចម្រើននៃពាណិជ្ជកម្មតាមប្រព័ន្ធអេឡិចត្រូនិក។

ប្រភព៖ មន្ទីរព័ត៌មាន ខេត្តសៀមរាប