ជនសង្ស័យ៧នាក់ ស្លៀកស្បង់ក្លែងក្លាយជាព្រះសង្ឃ ដើរបិណ្ឌបាតបោកប្រាក់ប្រជាពលរដ្ឋ ត្រូវឃាត់ខ្លួននៅកណ្ដាលស្ទឹង

ខេត្តកណ្តាល – សមត្ថកិច្ចស្រុកកណ្តាលស្ទឹង បានឃាត់ខ្លួនជនសង្ស័យចំនួន ៧ នាក់ ដែលស្លៀកពាក់បែបព្រះពុទ្ធសាសនាដោយគ្មានសិទ្ធិ ដើម្បីដើរបិណ្ឌបាតបោកប្រាក់ប្រជាពលរដ្ឋ។ ឧក្រិដ្ឋកម្មនេះកើតឡើងនៅថ្ងៃទី២១ ខែមីនា ឆ្នាំ២០២៦ វេលាម៉ោង១០ព្រឹក នៅភូមិដើមត្រាំង ឃុំអន្លង់រមៀត ស្រុកកណ្តាលស្ទឹង។

ជនសង្ស័យទាំង ៧ នាក់ដែលត្រូវឃាត់ខ្លួនមាន៖ ហ៊ុន ព្រឿន (៤២ឆ្នាំ), ភួន ផានិត (២០ឆ្នាំ), ដេង វុត្ថា (២៦ឆ្នាំ), គង់ រុន (៦១ឆ្នាំ), ភោគ សៀន (៣១ឆ្នាំ), សឹង សុខនី (៤៤ឆ្នាំ) និង ឡាន់ ឌីណា (១២ឆ្នាំ)។ ពួកគេស្នាក់នៅតាមតំបន់ផ្សេងៗ និងមានមុខរបរមិនពិតប្រាកដ។

សមត្ថកិច្ចបានចាប់យកវត្ថុតាងជាច្រើនរួមមាន៖ ស្បង់ជីវរ ៦ កំប្លេ, ថង់យាម ៨ កំប្លេ, បាត្រ ៥ គ្រឿង, ខ្សែកាត ២ កំប្លេ, ទូរស័ព្ទ ៤ គ្រឿង និងឆត្រ ៣ កំប្លេ។

ព្រឹត្តិការណ៍នេះចាប់ផ្ដើមពីព្រឹកម៉ោង ៧:៤០ នៅពេលជនសង្ស័យ ៣ នាក់ដំបូងបានដើរបិណ្ឌបាតនៅមុខវត្តអន្លង់រមៀត និងផ្សារកំពុងកន្ទួត។ នៅម៉ោង ១០ ព្រឹក សមត្ថកិច្ចបានឃាត់ខ្លួនពួកគេ ហើយពួកគេបានសារភាពថាពិតជាបានក្លែងក្លាយជាព្រះសង្ឃដើម្បីបោកប្រាក់ប្រជាពលរដ្ឋ។

បន្ទាប់មក សមត្ថកិច្ចបានឃាត់ខ្លួនជនសង្ស័យ ៤ នាក់ទៀតដែលស្នាក់នៅម្តុំព្រៃទា រាជធានីភ្នំពេញ។ តាមការស៊ើបអង្កេត ជនសង្ស័យទាំងនេះធ្លាប់បានដើរបិណ្ឌបាតក្នុងស្រុកកណ្ដាលស្ទឹងចំនួន ៣-៤ លើករួចមកហើយ។

បច្ចុប្បន្ន ជនសង្ស័យទាំងអស់កំពុងត្រូវឃាត់ខ្លួននៅអធិការដ្ឋាននៃគរបាលស្រុកកណ្ដាលស្ទឹង ដើម្បីកសាងសំណុំរឿង និងបន្តតាមនីតិវិធីច្បាប់។